തിരുവനന്തപുരം : മുൻ ഐഎഎസ് ഉദ്യോഗസ്ഥൻ കണ്ണൻ ഗോപിനാഥൻ കോൺഗ്രസിൽ അംഗത്വം സ്വീകരിച്ചു. എഐസിസി ആസ്ഥാനത്ത് എത്തിയാണ് അംഗത്വം സ്വീകരിച്ചത്. 2019 ജമ്മു കാശ്മീരിലെ ആർട്ടിക്കിൾ 370 റദ്ദാക്കിയത് പ്രതിഷേധിച്ചാണ് അദ്ദേഹം സർവീസിൽ നിന്നും രാജിവച്ചത്. കോൺഗ്രസ് അഭിപ്രായസ്വാതന്ത്ര്യത്തിന് പറ്റിയ ഇടമാണ് എന്നാണ് കണ്ണൻ ഗോപിനാഥൻ കോൺഗ്രസിലേക്ക് ചേരുന്നതിന് മുന്നോടിയായി പ്രതികരണം നടത്തിയത്.

ജമ്മു കാശ്മീരിന്റെ പ്രത്യേക പദവി എടുത്തു കളഞ്ഞ സാഹചര്യത്തിലാണ് കണ്ണൻ ഗോപിനാഥൻ കേന്ദ്രസർക്കാർ നയങ്ങൾക്കെതിരെ രൂക്ഷ വിമർശനവുമായി രംഗത്തെത്തിയത്. കാശ്മീരികളുടെ ജനാധിപത്യ അവകാശവും ഭരണഘടന അവകാശവും ലംഘിക്കപ്പെടുന്നുവെന്നും രാജ്യത്തെ ഒരു പൗരൻ എന്ന നിലയിൽ തനിക്ക് നിശബ്ദനായിരിക്കാൻ കഴിയില്ലെന്നും കണ്ണൻ ഗോപിനാഥൻ തുറന്നടിച്ചിരുന്നു.

കൂടാതെ നോട്ടു നിരോധനം അടക്കമുള്ള കേന്ദ്രസർക്കാരിന്റെ ഓരോ നയങ്ങൾക്കെതിരെയും അതിരൂക്ഷമായ വിമർശനമാണ് അദ്ദേഹം ഉന്നയിച്ചിരുന്നത്. ഇതിന്റെ പശ്ചാത്തലത്തിൽ കേന്ദ്രസർക്കാർ കണ്ണൻ ഗോപിനാഥനെതിരെ കുറ്റപത്രം സമർപ്പിച്ചിരുന്നു. കേന്ദ്ര സർക്കാറിന്റെ പ്രതിച്ഛായ കളയാൻ ഐഎഎസ് ഉദ്യോഗസ്ഥൻ ശ്രമം നടത്തി എന്ന തരത്തിൽ ആയിരുന്നു കുറ്റപത്രം.