മലപ്പുറം: മലപ്പുറത്ത് ശൈശവ വിവാഹം നടത്താൻ നീക്കം. 14 വയസ്സുകാരിയുടെ വിവാഹ നിശ്ചയം നടത്തി. പെൺകുട്ടിയുടെ മിഠായി കൊടുക്കൽ ചടങ്ങാണ് നടത്തിയത്. സംഭവത്തിൽ കുട്ടിയുടെ വീട്ടുകാർക്കും പ്രതിശ്രുത വരനും വീട്ടുകാർക്കും എതിരെ കേസെടുത്തു. മലപ്പുറം മാറാക്കരയിൽ ആണ് ഇന്നലെ 14 വയസ്സുകാരിയുടെ വിവാഹനിശ്ചയത്തിന് സമാനമായ ചടങ്ങുകൾ നടത്തിയത്. പെൺകുട്ടിയുടെ അമ്മാവന്റെ മകനുമായാണ് വിവാഹമുറപ്പിച്ചത്. ഇത്തരം ഒരു ചടങ്ങ് നടക്കുവാൻ പോകുന്നതിന് കുറിച്ച് ചൈൽഡ് വെൽഫെയർ കമ്മിറ്റിക്ക് നേരത്തെ വിവരം ലഭിച്ചിരുന്നു.

തുടർന്ന് വിവാഹനിശ്ചയം നടത്തരുതെന്ന് ചൈൽഡ് വെൽഫെയർ കമ്മിറ്റി കുടുംബത്തിന് താക്കീതും നൽകിയതായിരുന്നു. എന്നാൽ കുടുംബം താക്കീത് അവഗണിച്ചാണ് ചടങ്ങ് നടത്തിയത്. ഈ സാഹചര്യത്തിൽ കാടാമ്പുഴ പോലീസിന് ലഭിച്ച പരാതിയുടെ അടിസ്ഥാനത്തിലാണ് കേസ്. 10 പേർക്കെതിരെയാണ് കേസ് ഫയൽ ചെയ്തത്. ചടങ്ങിൽ സംബന്ധിച്ച മുഴുവൻ ആളുകൾക്കും എതിരെ കേസെടുത്തു. പെൺകുട്ടിയെ ഇപ്പോൾ സി ഡബ്ല്യുസിയുടെ സംരക്ഷണ കേന്ദ്രത്തിലേക്ക് മാറ്റി. വിഷയത്തിൽ ബാലാവകാശ കമ്മീഷൻ ജില്ലാ വനിതാ ശിശു വികസന ഓഫീസറോട് റിപ്പോർട്ട് തേടി.