ഡിപ്രഷനെക്കുറിച്ചും മൂഡ്സ്വിങ്സിനെക്കുറിച്ചും നടി കൃഷ്ണപ്രഭയുടെ അഭിപ്രായപ്രകടനം സോഷ്യൽ മീഡിയയിൽ വിമർശനങ്ങൾക്ക് തിരികൊളുത്തിയിരിക്കുകയാണ്. ഒരു അഭിമുഖത്തിലാണ് വളരെയേറെ ഗൗരവമേറിയ ഒരു വിഷയത്തെക്കുറിച്ച് വളരെ അപക്വമായ രീതിയിൽ നടി അഭിപ്രായം പറഞ്ഞത്. ഇപ്പോൾ പലരും പറയുന്നത് കേൾക്കാം ഡിപ്രഷൻ ആണ് മൂഡ്സ്വിങ്സ് ആണ് എന്നൊക്കെ. യഥാർത്ഥത്തിൽ ഒരു പണിയും ഇല്ലാത്തവർക്ക് തോന്നുന്ന കാര്യമാണ് ഇത് എന്നാണ് കൃഷ്ണപ്രഭ പറഞ്ഞത്. ഡിപ്രഷൻ എന്ന് പറയുന്നത് പണ്ടത്തെ വട്ട് തന്നെയല്ലേ എന്ന് എനിക്ക് തോന്നാറുണ്ട്. പിന്നെ ഇപ്പോൾ അതിന് കുറച്ച് മോഡേൺ പേരൊക്കെ ഇട്ട് വിളിക്കുന്നല്ലേ ഉള്ളൂ എന്നാണ് കൃഷ്ണപ്രഭ പറഞ്ഞത്.

വലിയ രീതിയിലുള്ള വിമർശനമാണ് താരത്തിനെതിരെ ഉയരുന്നത്. എന്നാൽ ഇതിന് പിന്നാലെ താൻ പറഞ്ഞതിൽ ഉറച്ചുനിൽക്കുന്നു എന്നും പറഞ്ഞ് മറ്റൊരു പ്രകടനവും താരം നടത്തിയിട്ടുണ്ട്. പറഞ്ഞതിൽ തെറ്റുണ്ടെന്ന് തോന്നുന്നില്ലെന്നും, കാര്യങ്ങളെ വെറുതെ ഊതി പെരുപ്പിക്കുകയാണെന്നുമാണ് നടിയുടെ പ്രതികരണം. കാര്യങ്ങൾ വെറുതെ തെറ്റിദ്ധരിപ്പിക്കുകയാണ്. വെറുതെ ഇരിക്കുന്നതു കൊണ്ടാണ് ഇത്തരം ചിന്തകൾ വരുന്നതെന്നും. മനുഷ്യന്റെ മനസ്സ് അങ്ങനെയാണെന്നും ആണ് താൻ പറഞ്ഞത് എന്ന് കൃഷ്ണപ്രഭ പ്രതികരിച്ചു.