കൊച്ചി: നടൻ കലാഭവൻ മണിക്കും കുടുംബത്തിനും തണലായി മാറിയ ഹയറുന്നീസ (89) ഓർമ്മയായി. ചേനത്തുനാട് പാളയം കോട്ടുകാരൻ പരേതനായ മുസ്തഫയുടെ ഭാര്യയായ ഹയറുന്നീസ കഴിഞ്ഞ ദിവസമാണ് തന്റെ പ്രിയപ്പെട്ടവരോട് വിട പറഞ്ഞത്. തങ്ങളുടെ ജീവിതത്തിലെ വിളക്കായിരുന്ന ഉമ്മയുടെ വിയോഗവാർത്ത മണിയുടെ സഹോദരൻ ആർ.എൽ.വി. രാമകൃഷ്ണനാണ് ഫേസ്ബുക്കിലൂടെ ലോകത്തെ അറിയിച്ചത്.

കലാഭവൻ മണിയുടെ അയൽവാസിയായിരുന്നു ഹയറുന്നീസ. കുട്ടിക്കാലത്ത് തങ്ങൾക്ക് വയറു നിറയെ ആഹാരം തന്ന് ചേർത്തു പിടിച്ച, സ്നേഹ നിധിയായ ഉമ്മ യാത്രയായി, എന്നാണ് രാമകൃഷ്ണൻ ഫേസ്ബുക്കിൽ കുറിച്ചത്. ഏഴ് മക്കളാണ് ഹയറുന്നിസയ്ക്ക് ഉണ്ടായിരുന്നത്. എങ്കിലും മണി ഉൾപ്പെടെയുള്ള രാമകൃഷ്ണന്റെ കുടുംബവും ഉമ്മയ്ക്ക് മക്കളെ പോലെയായിരുന്നുവെന്ന് രാമകൃഷ്ണൻ പറയുന്നു. കുട്ടിക്കാലത്ത് ഉമ്മയെ ചുറ്റിപ്പറ്റിയായിരുന്നു തങ്ങളുടെ ജീവിതമെന്നും അദ്ദേഹം ഓർത്തെടുത്തു. ചാലക്കുടി മാർക്കറ്റിലേക്കും റേഷൻ കടയിലേക്കുമുള്ള യാത്രകളിലെല്ലാം കലാഭവൻ മണിയുടെ കുടുംബം ഉമ്മയ്ക്ക് ഒപ്പമായിരുന്നു.

ഹയറുന്നീസയുടെ മകനായ അലി (സൈലബ്ദീൻ) വാങ്ങിയ 'മുസ്തഫ സൺസ്' എന്ന ലാമ്പർട്ട ഓട്ടോ റിക്ഷയാണ് കലാഭവൻ മണി ആദ്യമായി ഓടിച്ച വാഹനം. എവിടെ പോയാലും ഉമ്മയുടെ അടുത്ത് വിവരങ്ങൾ പറഞ്ഞിട്ടേ പോകാറുള്ളൂ എന്നും തിരികെ വരുമ്പോൾ എല്ലാ വിശേഷങ്ങളും ഉമ്മ ചോദിച്ചറിയുമെന്നും രാമകൃഷ്ണൻ ഓർക്കുന്നു."ഇനി ആ വിളിയുമില്ല, സ്നേഹാന്വേഷണവുമില്ല. ഇതോടെ ഞങ്ങളുടെ ഒരു കാലഘട്ടത്തിലെ കാരണവന്മാരുടെ കണ്ണികൾ ഇല്ലാതെയായി," എന്ന വികാരനിർഭരമായ കുറിപ്പോടെയാണ് രാമകൃഷ്ണൻ പോസ്റ്റ് അവസാനിപ്പിച്ചത്. ഹയറുന്നീസയുടെ കബറടക്കം ബുധനാഴ്ച വൈകുന്നേരം 4.30 ന് ആര്യങ്കാല ജുമാ മസ്ജിതിൽ നടന്നു.