ചെന്നൈ: കരൂർ ദുരന്തത്തിൽ മരിച്ചവരുടെ കുടുംബങ്ങളുമായി തമിഴക വെട്രിക് കഴകം അധ്യക്ഷൻ വിജയ് വിഡിയോകോളിലൂടെ സംസാരിച്ചു. സംഭവിക്കാൻ പാടില്ലാത്ത ദുരന്തമാണിതെന്നും എന്നും ഒപ്പമുണ്ടാകുമെന്നും അദ്ദേഹം കുടുംബങ്ങൾക്ക് ഉറപ്പുനൽകി. കരൂർ ദുരന്തം സംഭവിച്ച് പത്താം ദിവസമാണ് തമിഴക വെട്രിക് കഴകം അധ്യക്ഷൻ വിജയ്, മരിച്ചവരുടെ കുടുംബങ്ങളുമായി വിഡിയോകോളിൽ സംസാരിച്ചത്. ഇന്നലെ രാത്രിയോടെ, ദുരന്തത്തിൽ മരിച്ച ഇരുപതിലധികം പേരുടെ കുടുംബങ്ങളുമായാണ് അദ്ദേഹം ബന്ധപ്പെട്ടത്.

ഓരോരുത്തരുമായി പതിനഞ്ച് മിനിറ്റിലധികം സംസാരിച്ചതായാണ് വിവരം. ദുരന്തത്തിൽ തനിക്ക് വലിയ ദുഃഖമുണ്ടെന്നും സംഭവിക്കാൻ പാടില്ലാത്തതാണുണ്ടായതെന്നും അദ്ദേഹം പറഞ്ഞു. എന്നും കുടുംബങ്ങൾക്ക് ഒപ്പമുണ്ടാകുമെന്ന് വിജയ് ഉറപ്പ് നൽകി. സംഭാഷണത്തിന്റെ ദൃശ്യങ്ങൾ പകർത്തരുതെന്നും അദ്ദേഹം ആവശ്യപ്പെട്ടതായി സൂചനയുണ്ട്.

മരിച്ചവരുടെ കുടുംബാംഗങ്ങളെ പനയൂരിലെ പാർട്ടി ഓഫീസിലെത്തിച്ച് നഷ്ടപരിഹാരം നൽകാനാണ് തമിഴക വെട്രിക് കഴകം (ടി.വി.കെ.) ശ്രമിക്കുന്നത്. ഇതിനിടെ, ദുരന്തത്തിൽ സി.ബി.ഐ. അന്വേഷണം ആവശ്യപ്പെട്ട് ബി.ജെ.പി. നേതാവ് ഉമ ആനന്ദൻ നൽകിയ ഹർജി വെള്ളിയാഴ്ച പരിഗണിക്കാമെന്ന് സുപ്രീം കോടതി അറിയിച്ചു.