തിരുവനന്തപുരം: സ്വർണ്ണപ്പാളി വിവാദത്തിൽ നിയമസഭയിൽ ഇന്നും കടുത്ത പ്രതിഷേധം. ദേവസ്വം മന്ത്രി രാജിവെക്കണം എന്ന് പ്രതിപക്ഷ നേതാവ് വി.ഡി. സതീശൻ ആവശ്യപ്പെട്ടു. ചോദ്യോത്തര വേള പൂർണ്ണമായി തടസ്സപ്പെടുത്തിയ പ്രതിപക്ഷം, 'രാജി വെക്കൂ, പുറത്തു പോകൂ' എന്ന് മുദ്രാവാക്യം വിളിച്ച് നടുത്തളത്തിൽ ഇറങ്ങി. ഹൈക്കോടതി വിധി ഞെട്ടിക്കുന്നതാണെന്ന് അഭിപ്രായപ്പെട്ട വി.ഡി. സതീശൻ, സ്വർണം പൂശിയ യഥാർത്ഥ ദ്വാരപാലക ശിൽപ്പം കൂടിയ വിലയ്ക്ക് വിറ്റ് ലക്ഷക്കണക്കിന് വിശ്വാസികളെ വഞ്ചിച്ചു എന്ന് വിമർശിച്ചു. ഇത് അതീവ ഗൗരവതരമായ വിഷയമാണ്.

അതിനാൽ ദേവസ്വം മന്ത്രി രാജിവെക്കുകയും ദേവസ്വം ബോർഡ് പ്രസിഡൻ്റിനെ പുറത്താക്കുകയും വേണമെന്ന് പ്രതിപക്ഷ നേതാവ് ആവശ്യപ്പെട്ടു. എന്നാൽ പ്രതിപക്ഷത്തിൻ്റേത് ജനാധിപത്യ വിരുദ്ധമായ സമീപനമാണ് എന്ന് ഭരണപക്ഷം കുറ്റപ്പെടുത്തി. അതേസമയം ഏത് അന്വേഷണത്തെയും സ്വാഗതം ചെയ്യുന്നുവെന്ന് മന്ത്രി പി. രാജീവ് പ്രതികരിച്ചു. ഹൈക്കോടതി വിധിയെ മാനിക്കാൻ പ്രതിപക്ഷം തയ്യാറല്ലെന്നും അദ്ദേഹം കുറ്റപ്പെടുത്തി. ഉന്നത നീതിപീഠത്തിൽ പ്രതിപക്ഷത്തിന് വിശ്വാസം നഷ്ടപ്പെട്ടിട്ട് കാലമായെന്ന് മന്ത്രി എം.ബി. രാജേഷ് ആരോപിച്ചു.

തുടർച്ചയായ തിരിച്ചടികൾ കാരണമാണ് ഈ അവസ്ഥ. "കോടതിയെ ഭയമാണ്, നിയമസഭയെ ഭയമാണ്, ചർച്ചയെ ഭയമാണ്. ഭീരുത്വം ആവർത്തിക്കപ്പെടുന്നു" എന്ന് അദ്ദേഹം കൂട്ടിച്ചേർത്തു. സാധാരണക്കാരുടെ പ്രശ്‌നങ്ങൾ ചർച്ച ചെയ്യുന്ന ചോദ്യോത്തര വേള തടസ്സപ്പെടുത്തുന്നത് ശരിയല്ലെന്ന് എം.എൽ.എ. കെ.എം. സച്ചിൻ ദേവ് പറഞ്ഞു. പ്രതിപക്ഷത്തിൻ്റെ ഈ ജനാധിപത്യ വിരുദ്ധ സമീപനം ജനങ്ങൾ കാണുന്നുണ്ടെന്ന് കെ.കെ. ശൈലജ പ്രതികരിച്ചു. പ്രതിപക്ഷ പ്രതിഷേധം ശക്തമായതിനെ തുടർന്ന് ചോദ്യോത്തര വേള റദ്ദാക്കി.