ആലപ്പുഴ: തിരുവിതാംകൂർ ദേവസ്വംബോർഡ് ഭരണ സംവിധാനം ഉടച്ചുവാർക്കണമെന്ന് എസ്.എൻ.ഡി.പി. യോഗം ജനറൽ സെക്രട്ടറി വെള്ളാപ്പള്ളി നടേശൻ. ശബരിമലയിലെ സ്വർണപ്പാളിയുമായി ബന്ധപ്പെട്ട് ഉയർന്ന ആരോപണങ്ങൾ ഉൾപ്പെടെ അന്വേഷിക്കാൻ സി.ബി.ഐ. വരട്ടെ എന്നും അദ്ദേഹം പറഞ്ഞു. ഉണ്ണിക്കൃഷ്ണൻ പോറ്റി മാത്രം വിചാരിച്ചാൽ ഇത്രയും വലിയ തട്ടിപ്പ് നടത്താൻ കഴിയില്ലെന്നും, ഇതിന് പിന്നിൽ വൻ ശക്തികൾ ഉണ്ടെന്നും അദ്ദേഹം കൂട്ടിച്ചേർത്തു.

തിരുവിതാംകൂർ ദേവസ്വം ബോർഡിന് കീഴിലുള്ള 1251 ക്ഷേത്രങ്ങളിൽ 51 ക്ഷേത്രങ്ങൾക്ക് മാത്രമാണ് സ്വയംപര്യാപ്തതയുള്ളതെന്ന് വെള്ളാപ്പള്ളി നടേശൻ ചൂണ്ടിക്കാട്ടി. "ബാക്കിയുള്ളതെല്ലാം ശബരിമല അയ്യപ്പന്റെ കാരുണ്യത്തിലാണ് നടന്നുപോകുന്നത്. ഏതായാലും അയ്യപ്പനെ കൊണ്ടുപോയില്ല. അതുകൊണ്ട് പോയിട്ട്‌ കാര്യമില്ല. കരിങ്കല്ലാണ്. കനമുള്ളതുകൊണ്ട് പോകാൻ പലരും ശ്രമിച്ചിട്ടുണ്ട്. തിരുവിതാംകൂർ ദേവസ്വം ബോർഡ് എന്നും ഒരുപാട് അഴിമതിയും കെടുകാര്യസ്ഥതയുമുള്ള ബോർഡാണെന്ന് അദ്ദേഹം ആരോപിച്ചു. "ദേവസ്വം ബോർഡിൽ ഗൂഢസംഘം ഇല്ലെങ്കിൽ പിന്നെ എങ്ങനെയാണ് തട്ടിപ്പ് നടക്കുക?" എന്നും അദ്ദേഹം ചോദിച്ചു.

തിരുവിതാംകൂർ ദേവസ്വംബോർഡിന്റെ ഭരണ സംവിധാനം ഉടച്ചുവാർക്കണമെന്ന് ആവശ്യപ്പെട്ട വെള്ളാപ്പള്ളി നടേശൻ, ദേവസ്വംബോർഡുകൾ പല രാഷ്ട്രീയക്കാർക്കും ഇടംകൊടുക്കാനും അവസരം കൊടുക്കാനുമുള്ള ഒരു ഇടനാഴിയായിട്ട് മാറിയിട്ടുണ്ടെന്ന് വിമർശിച്ചു. ഭരണ സംവിധാനം മെച്ചപ്പെടുത്താൻ രാഷ്ട്രീയക്കാർക്കൊപ്പം ഐ.എ.എസ്സുകാരെ ഉൾപ്പെടുത്തി പുതിയ സംവിധാനം ഏർപ്പെടുത്തണം. "ഐ.എ.എസ്സുകാർക്ക് കള്ളം ചെയ്യാൻ ഭയമാണ്. അവർക്ക് ഉത്തരവാദിത്തം ഉണ്ടാകും. രാഷ്ട്രീയക്കാർക്ക് എന്തും ചെയ്യാം," അദ്ദേഹം പറഞ്ഞു. അതിനാൽ, ദേവസ്വംബോർഡിനെ സർക്കാർ നേരിട്ട് നിയന്ത്രിക്കണം എന്നും വെള്ളാപ്പള്ളി കൂട്ടിച്ചേർത്തു.