മോഹൻലാലിനോടൊപ്പം പ്രവർത്തിക്കാൻ എനിക്ക് ഇനിയും അവസരം കിട്ടിയിട്ടില്ല, എന്നാൽ അദ്ദേഹത്തിന്റെ കഴിവുകളെപ്പറ്റി അങ്ങേയറ്റം അഭിമാനിക്കുകയും അതിനെ ആദരിക്കുകയും ചെയ്യുന്നതായി ലോകാരാധ്യനായ ചലച്ചിത്രപ്രതിഭയും ദാദാസാഹേബ് ഫാൽക്കെ പുരസ്‌കാരം നേടിയ ആദ്യ മലയാളിയുമായ അടൂർ ഗോപാലകൃഷ്ണൻ പറഞ്ഞു. മലയാളത്തിന്റെ വലുപ്പത്തെ ലോകത്തിന് മുന്നിൽ പ്രതിനിധീകരിക്കുന്ന വ്യക്തിത്വമാണ് മോഹൻലാൽ. മോഹൻലാലിനെ ആദരിക്കുന്ന 'മലയാളം വാനോളം ലാൽസലാം' പരിപാടിയിൽ ആശംസകൾ അർപ്പിക്കുകയായിരുന്നു അടൂർ ഗോപാലകൃഷ്ണൻ.
മോഹൻലാലിന് ആദ്യ ദേശീയ പുരസ്‌ക്കാരം ലഭിക്കുന്നതിന്റെ ജൂറി ചെയർമാനായിരുന്നു താനെന്ന് അദ്ദേഹം ഓർമിച്ചു. മോഹൻലാലിന് ദേശീയ തലത്തിലുള്ള ബഹുമതികൾ ലഭിച്ചു തുടങ്ങുന്നത് അവിടെ നിന്നാണ്. മോഹൻലാലിന് ദാദാസാഹേബ് ഫാൽക്കെ പുരസ്‌ക്കാരം ലഭിച്ചതിന്റെ ഭാഗമായി സംസ്ഥാന സർക്കാരിന്റെ ആഭിമുഖ്യത്തിൽ കേരളം അദ്ദേഹത്തെ ആദരിക്കുന്നു എന്നതിൽ സന്തോഷവും അഭിമാനവുമുണ്ട്. ഓരോ മലയാളിക്കും തങ്ങളുടെ പ്രതിബിംബം മോഹൻലാലിൽ കാണാനാകും. അതിനാലാണ് ലോകത്ത് എവിടെ ജീവിക്കുന്ന മലയാളികളുടെയും സ്‌നേഹപാത്രമാകാൻ അദ്ദേഹത്തിന് കഴിഞ്ഞത്. മോഹൻലാലിന് കൂടുതൽ അഭിനയജീവിതവും വിജയങ്ങളും ഉണ്ടാവട്ടെ എന്ന് അദ്ദേഹം ആശംസിച്ചു.
മോഹൻലാൽ ഇന്ത്യയിലെ എല്ലാ സിനിമാ മേഖലകളിലുള്ളവരുടെയും ലാലേട്ടനാണെന്ന് സിനിമാനടി അംബിക പറഞ്ഞു. ലാലേട്ടന്റെ മൈൽസ്റ്റോൺ ചിത്രങ്ങളിലെ നായികയായിരുന്നു ഞാൻ എന്നത് അഭിമാനത്തോടെ ഓർക്കുകയാണ്. രാജാവിന്റെ മകനിലെ വിൻസെന്റ് ഗോമസിന്റെ ഒപ്പം ആൻസിയായും, ഇരുപതാം നൂറ്റാണ്ടിൽ സാഗർ ഏലിയാസ് ജാക്കിയോടൊപ്പം അശ്വതി വർമ്മയായും അഭിനയിക്കാൻ കഴിഞ്ഞിരുന്നു. മലയാളത്തിന്റെ സ്വന്തം ലാലേട്ടൻ ഒട്ടേറെ വർഷങ്ങൾ ആരോഗ്യത്തോടെ ഇരിക്കട്ടെയെന്നും നിരവധി അവാർഡുകൾ ഇനിയും മലയാളത്തിന് വേണ്ടി വാങ്ങട്ടെയെന്നും അംബിക ആശംസിച്ചു.