ചെന്നൈ: തമിഴ്നാട്ടിലെ കരൂരിൽ നടനും രാഷ്ട്രീയ നേതാവുമായ വിജയ് നയിച്ച റാലിയിൽ ഉണ്ടായ തിക്കിലും തിരക്കിലും പെട്ട് 41 പേർ മരിച്ച ദുരന്തത്തിൻ്റെ പശ്ചാത്തലത്തിൽ, അപവാദങ്ങളും കിംവദന്തികളും സാമൂഹിക മാധ്യമങ്ങളിലൂടെ പ്രചരിപ്പിക്കരുത് എന്ന് തമിഴ്നാട് മുഖ്യമന്ത്രി എം.കെ. സ്റ്റാലിൻ. ഒരു രാഷ്ട്രീയ നേതാവും തൻ്റെ അനുയായികളോ മറ്റ് ജനങ്ങളോ മരിക്കാൻ ആഗ്രഹിക്കില്ല.

ദുരന്തത്തിൽ മരിച്ചത് ഏത് രാഷ്ട്രീയ പാർട്ടിയെ പിന്തുണയ്ക്കുന്നവരാണെങ്കിലും, അവരെല്ലാം നമ്മുടെ തമിഴ് സഹോദരങ്ങളാണെന്നും തമിഴ്നാട് മുഖ്യമന്ത്രി പറഞ്ഞു. രാഷ്ട്രീയ വ്യത്യാസങ്ങളും വ്യക്തിപരമായ തർക്കങ്ങളും ശത്രുതയും എല്ലാം മാറ്റിവെച്ച്, ജനങ്ങളുടെ ക്ഷേമത്തിൽ മാത്രം ശ്രദ്ധ കേന്ദ്രീകരിക്കണമെന്നും അദ്ദേഹം എല്ലാവരോടും അഭ്യർഥിച്ചു.

കരൂരിൽ സംഭവിച്ചത് ഒരു വലിയ ദുരന്തമാണ്. ഭയാനകമായ ദുരന്തം. മുമ്പൊരിക്കലും സംഭവിക്കാത്തതും ഇനി ഒരിക്കലും സംഭവിക്കാൻ പാടില്ലാത്തതുമായ ഒരു ദുരന്തമെന്നും സ്റ്റാലിൻ. കരൂരിൽ എന്താണ് സംഭവിച്ചതെന്ന് വിശദമായി അന്വേഷിക്കുന്നതിനു വേണ്ടി ജസ്റ്റിസ് അരുണ ജഗദീശന്റെ നേതൃത്വത്തിൽ ഒരു ഏകാംഗ കമ്മീഷനെ നിയോഗിച്ചിട്ടുണ്ട്.

കമ്മീഷൻ്റെ റിപ്പോർട്ട് ലഭിച്ച ശേഷം, ഭാവിയിൽ ഇത്തരം സംഭവങ്ങൾ ആവർത്തിക്കാതിരിക്കാൻ, എല്ലാ രാഷ്ട്രീയ പാർട്ടികളുമായും പൊതു സംഘടനകളുമായും കൂടിയാലോചിച്ച് ആവശ്യമായ നടപടികൾ സ്വീകരിക്കുമെന്ന് മുഖ്യമന്ത്രി സ്റ്റാലിൻ അറിയിച്ചു. രാഷ്ട്രീയ പാർട്ടികളും പൊതു സംഘടനകളും ഇത്തരം പരിപാടികൾ സംഘടിപ്പിക്കുമ്പോൾ എങ്ങനെ ഉത്തരവാദിത്വത്തോടെ പ്രവർത്തിക്കണം എന്ന് വ്യക്തമാക്കുന്നതിനായി നിയമങ്ങൾ ഉണ്ടാക്കേണ്ടതുണ്ടെന്നും അദ്ദേഹം പറഞ്ഞു.