കൊച്ചി∙ മുൻ ഡി.ജി.പി. ജേക്കബ് തോമസ് ആർ.എസ്.എസ്സിൽ (RSS) സജീവമാകുന്നു. ഇതിന്റെ ഭാഗമായി അടുത്ത മാസം ഒന്നിന് കൊച്ചിയിൽ നടക്കുന്ന ആർ.എസ്.എസ്. പഥസഞ്ചലനത്തിൽ അദ്ദേഹം ആർ.എസ്.എസ്സിന്റെ വേഷമണിഞ്ഞ് പങ്കെടുക്കും.

നിലവിൽ ഭാരവാഹിത്വമില്ലെങ്കിലും ബി.ജെ.പി.യുടെ ഭാഗമായി പ്രവർത്തിക്കുകയായിരുന്നു ജേക്കബ് തോമസ്. ഭാരതത്തോട് ചേർന്നുനിൽക്കാനാണ് ആർ.എസ്.എസ്സിൽ സജീവമാകുന്നതെന്ന് അദ്ദേഹം പറഞ്ഞു. സംഘത്തിന് രാഷ്ട്രീയമില്ലെന്നും ലോകത്തെ ഏറ്റവും വലിയ സന്നദ്ധ സംഘടനയാണിതെന്നുമാണ് അദ്ദേഹത്തിന്റെ അഭിപ്രായം. ജനങ്ങളുടെ ഉന്നതിക്കായി പ്രവർത്തിക്കുന്ന ആ സംഘടനയുടെ ഭാഗമാവുകയാണ് താനെന്നും അദ്ദേഹം കൂട്ടിച്ചേർത്തു.

ജേക്കബ് തോമസ് 2021-ലാണ് ബി.ജെ.പി. അംഗത്വം സ്വീകരിച്ചത്. ബി.ജെ.പി. ദേശീയ അധ്യക്ഷൻ ജെ.പി. നഡ്ഡ പങ്കെടുത്ത തൃശൂർ സമ്മേളനത്തിലായിരുന്നു ഇത്. തുടർന്ന് ഇരിങ്ങാലക്കുട നിയമസഭാ മണ്ഡലത്തിൽ ബി.ജെ.പി. സ്ഥാനാർഥിയായി മത്സരിച്ചെങ്കിലും പരാജയപ്പെട്ടിരുന്നു.