പരപ്പനങ്ങാടി: ജീവിക്കാൻ മാർഗമില്ലെന്ന് പറഞ്ഞ് അധ്യാപികയെ വഞ്ചിച്ച് 47 ലക്ഷം രൂപ തട്ടിയെടുത്ത കേസിൽ മുൻ വിദ്യാർത്ഥി പോലീസ് പിടിയിൽ. മകളുടെ വിവാഹ ആവശ്യങ്ങൾക്കായി അധ്യാപിക വർഷങ്ങളോളം സ്വരുക്കൂട്ടി വെച്ച പണമാണ് വിദ്യാർത്ഥി കബളിപ്പിച്ച് കൈക്കലാക്കിയത്. തലക്കടത്തൂരിലെ ഫിറോസ്( 51)നെയാണ് പോലീസ് പിടികൂടിയത്.

സംഭവത്തിൽ ഇയാളുടെ ഭാര്യയ്ക്ക് അറസ്റ്റു വാറണ്ടും നൽകി. വർഷങ്ങൾക്കുശേഷം പൂർവവിദ്യാർത്ഥി സംഗമത്തിൽ വച്ചാണ് ഇയാൾ അധ്യാപികയുമായുള്ള ബന്ധം വീണ്ടും പുതുക്കിയത്. തുടർന്ന് ബിസിനസ് തുടങ്ങാൻ ആണെന്ന് പറഞ്ഞ് 21 പവൻ സ്വർണവും വാങ്ങി ഇയാൾ കടന്നുകളയുകയായിരുന്നു.

അധ്യാപികയുടെ വിശ്വാസം നേടിയെടുക്കാൻ, പണം കൈപ്പറ്റുന്ന ഓരോ ഘട്ടത്തിലും പ്രതി വിവിധ കള്ളക്കഥകൾ മെനഞ്ഞതായി പോലീസ് അന്വേഷണത്തിൽ വ്യക്തമായി. സംഭവത്തെ തുടർന്ന് ലഭിച്ച പരാതിയുടെ അടിസ്ഥാനത്തിൽ പോലീസ് കേസെടുത്ത് പ്രതിയെ അറസ്റ്റ് ചെയ്തു. തട്ടിപ്പുമായി ബന്ധപ്പെട്ട് കൂടുതൽ അന്വേഷണം പുരോഗമിക്കുകയാണ്.