തമിഴ്‌നാട്: കള്ളക്കുറിച്ചിയിൽ മരുമകന് ചിക്കൻ കറി ഉണ്ടാക്കാൻ കോഴിക്ക് വച്ച വെടി ഉന്നംതെറ്റി അയൽവാസി മരിച്ചു. അണ്ണാമലൈ എന്നയാളാണ് വെടിയുതിർത്തത്. സംഭവത്തിൽ ഇയാളുടെ അയൽവാസിയായ പ്രകാശാണ് കൊല്ലപ്പെട്ടത്. മരുമകന് വേണ്ടി കോഴിയെ പിടിക്കാൻ ശ്രമിക്കുന്നതിനിടെയാണ് വെടിവെച്ചതെന്നും, എന്നാൽ ഉന്നം തെറ്റി പ്രകാശിന് കൊണ്ടെന്നുമാണ് അണ്ണാമലൈ പോലീസിന് നൽകിയ മൊഴി. വീട്ടിൽ അനധികൃതമായി സൂക്ഷിച്ചിരുന്ന തോക്കാണ് ഇയാൾ ഇതിനായി ഉപയോഗിച്ചത്.
കള്ളക്കുറിച്ചി ജില്ലയിലെ കരിയിലൂരിനടുത്തുള്ള മേൽമദൂർ ഗ്രാമത്തിലാണ് അതിദാരുണമായ ഈ സംഭവം നടന്നത്. മരുമകനുവേണ്ടി ചിക്കൻ കറി ഉണ്ടാക്കാൻ വീട്ടിൽ സൂക്ഷിച്ചിരുന്ന തോക്കെടുത്ത് അണ്ണാമലൈ വെടിയുതിർക്കുകയായിരുന്നു. എന്നാൽ അപ്രതീക്ഷിതമായി ലക്ഷ്യം തെറ്റി, അടുത്ത വീട്ടിൽ കിടക്കുകയായിരുന്ന പ്രകാശ് എന്ന യുവാവിന് വെടിയേറ്റു.
വെടിയേറ്റ പ്രകാശ് സംഭവസ്ഥലത്ത് വെച്ചുതന്നെ മരിച്ചു. വിവരമറിഞ്ഞ് ഉടൻ സ്ഥലത്തെത്തിയ പോലീസ് പ്രകാശിന്റെ മൃതദേഹം പോസ്റ്റ്‌മോർട്ടത്തിനായി അയച്ചു. ഈ സംഭവവുമായി ബന്ധപ്പെട്ട് അണ്ണാമലൈയെ അറസ്റ്റ് ചെയ്ത പോലീസ്, ഇയാളിൽ നിന്ന് നാടൻ തോക്ക് പിടിച്ചെടുത്തു.