താൻ അനുഭവിച്ച കഠിനമായ രോഗാവസ്ഥയെക്കുറിച്ച് മനസ്സ് തുറന്ന് ബോളിവുഡ് സൂപ്പർതാരം സൽമാൻ ഖാൻ. മുഖത്തെ ഞരമ്പുകളെ ബാധിക്കുന്ന ട്രൈജെമിനൽ ന്യൂറാൾജിയ എന്ന രോഗം കാരണം തനിക്കുണ്ടായ അസഹനീയമായ വേദനയെക്കുറിച്ചും അത് തന്റെ ജീവിതത്തെ എങ്ങനെ ബാധിച്ചുവെന്നുമാണ് സൽമാൻ തന്റെ ആരാധകരോട് പങ്കുവെച്ചത്. ഈ അവസ്ഥയുടെ തീവ്രത കാരണം ഈ രോഗം 'സൂയിസൈഡ് ഡിസീസ്' എന്നും അറിയപ്പെടാറുണ്ട്.

ആമിർ ഖാനുമായുള്ള 'ടു മച്ച്' എന്ന പരിപാടിയിൽ സംസാരിക്കവെയാണ് സൽമാൻ ഖാൻ തന്റെ രോഗവിവരം വെളിപ്പെടുത്തിയത്. ട്രൈജെമിനൽ ന്യൂറാൾജിയ കാരണം താൻ അനുഭവിച്ച കഷ്ടപ്പാടുകൾ അദ്ദേഹം ഓർത്തെടുത്തു. അസുഖം മൂലം ഒരു ഓംലെറ്റ് പോലും ചവച്ചരച്ച് കഴിക്കാൻ അദ്ദേഹത്തിന് വലിയ ബുദ്ധിമുട്ടുണ്ടായിരുന്നു. കഠിനമായ വേദന കാരണം പലപ്പോഴും പ്രഭാതഭക്ഷണം ഒഴിവാക്കി നേരിട്ട് അത്താഴം കഴിക്കേണ്ടി വന്നിട്ടുണ്ട്. ജീവൻ നിലനിർത്താൻ വേണ്ടി മാത്രം ഭക്ഷണം കഴിച്ച ആ ദുരിതകാലം അദ്ദേഹം പങ്കുവെച്ചു. ഈ കഠിനമായ വേദന തന്റെ ഏറ്റവും വലിയ ശത്രുവിന് പോലും വരരുതെന്ന് ആത്മാർത്ഥമായി ആഗ്രഹിച്ചിരുന്നതായും സൽമാൻ ഖാൻ പറഞ്ഞു.

'പാർട്ണർ' എന്ന സിനിമയുടെ ചിത്രീകരണ സമയത്താണ് ഈ വേദനയുടെ തുടക്കം. ആദ്യഘട്ടത്തിൽ പല്ലിന്റെ പ്രശ്‌നമാണെന്നാണ് ഡോക്ടർമാർ കരുതിയത്. എന്നാൽ, പിന്നീട് വെള്ളം കുടിക്കാൻ പോലും ബുദ്ധിമുട്ടുണ്ടായപ്പോഴാണ് ഇത് ട്രൈജെമിനൽ നാഡിയെ ബാധിക്കുന്ന ഗുരുതരമായ രോഗമാണെന്ന് തിരിച്ചറിഞ്ഞത്.

സംസാരത്തെയും ഭക്ഷണത്തെയും തടസ്സപ്പെടുത്തുന്ന ഈ അവസ്ഥ രോഗിയുടെ ജീവിതം ദുസ്സഹമാക്കും. കഠിനമായ വേദന സഹിക്കാനാകാതെ പലരും ആത്മഹത്യയെക്കുറിച്ച് ചിന്തിക്കുന്നതുകൊണ്ടാണ് ഈ രോഗത്തിന് 'സൂയിസൈഡ് ഡിസീസ്' എന്ന വിളിപ്പേര് വന്നത്. രോഗത്തിൽ നിന്ന് രക്ഷ നേടുന്നതിനായി സൽമാൻ ഖാൻ ഒരു ഗാമ നൈഫ് സർജറിക്ക് വിധേയനായി. എട്ട് മണിക്കൂറോളം നീണ്ടുനിന്ന ഈ ശസ്ത്രക്രിയയിലൂടെ 30 ശതമാനം ആശ്വാസം മാത്രമേ ലഭിക്കൂ എന്ന് വിദഗ്ദ്ധർ മുന്നറിയിപ്പ് നൽകിയിരുന്നു. എന്നാൽ, ഭാഗ്യവശാൽ തന്റെ രോഗം പൂർണ്ണമായി ഭേദമായെന്നും കഠിനമായ വേദനയിൽ നിന്ന് മുക്തി നേടിയെന്നും സൽമാൻ ഖാൻ വെളിപ്പെടുത്തി.