പത്തനംതിട്ട: ആഗോള അയ്യപ്പ സംഗമം വലിയ വിജയമായിരുന്നുവെന്ന് സി.പി.എം. സംസ്ഥാന സെക്രട്ടറി എം.വി. ഗോവിന്ദൻ. പരിപാടിയിൽ കസേരകൾ ഒഴിഞ്ഞുകിടക്കുന്ന രീതിയിൽ പ്രചരിക്കുന്ന ദൃശ്യങ്ങൾ വ്യാജമാണെന്നും, അത് നിർമിത ബുദ്ധി (AI) ഉപയോഗിച്ച് ഉണ്ടാക്കിയതാണെന്നും അദ്ദേഹം ആരോപിച്ചു.

3000 പേർ പങ്കെടുക്കുമെന്ന് പ്രതീക്ഷിച്ച സംഗമത്തിൽ 4600 പേർ പങ്കെടുത്തു. മറിച്ചുള്ള പ്രചാരണങ്ങൾ പച്ചക്കള്ളമാണ്. കോൺഗ്രസ് നാണവും മാനവുമില്ലാതെ വ്യാജപ്രചാരണം നടത്തുകയാണെന്നും എം.വി. ഗോവിന്ദൻ പറഞ്ഞു.

ശബരിമല വികസന പദ്ധതികളിൽ കൃത്യമായ തീരുമാനമെടുക്കാൻ കഴിഞ്ഞില്ലെങ്കിലും, എസ്.എൻ.ഡി.പി. യോഗത്തെയും എൻ.എസ്.എസിനെയും ഒരേ വേദിയിലെത്തിക്കാനായത് സർക്കാരിന് വലിയ രാഷ്ട്രീയ നേട്ടമായി വിലയിരുത്തപ്പെടുന്നു.

എസ്.എൻ.ഡി.പി. യോഗം ജനറൽ സെക്രട്ടറി വെള്ളാപ്പള്ളി നടേശൻ മുഖ്യമന്ത്രി പിണറായി വിജയനൊപ്പം ഔദ്യോഗിക കാറിലാണ് വേദിയിലെത്തിയത്. എൻ.എസ്.എസ്. വൈസ് പ്രസിഡന്റ് എം. സംഗീത് കുമാറിന്റെ സാന്നിധ്യവും ഈ നേട്ടത്തിന് മാറ്റ് കൂട്ടി.

ശബരിമല മാസ്റ്റർ പ്ലാനിലെ അനാവശ്യ നിർമിതികൾ പൊളിച്ചുനീക്കുന്നതുമായി ബന്ധപ്പെട്ട് കൂടുതൽ ഭേദഗതികളൊന്നും ഉണ്ടായില്ല. ആൾക്കൂട്ടത്തെ നിയന്ത്രിക്കാൻ നിർമിതബുദ്ധി (AI) ഉപയോഗിക്കണമെന്നതായിരുന്നു സംഗമത്തിലെ പ്രധാന തീരുമാനങ്ങളിലൊന്ന്. തുടർനടപടികൾക്കായി 18 അംഗ സമിതിയെ രൂപീകരിച്ച ശേഷമാണ് അയ്യപ്പ സംഗമം പിരിഞ്ഞതെന്നും അദ്ദേഹം പറഞ്ഞു.