ഇന്ത്യൻ സിനിമയിലെ പരമോന്നത ബഹുമതിയായ ദാദാസാഹേബ് ഫാൽക്കെ പുരസ്‌കാരം മലയാളത്തിന്റെ സ്വന്തം മോഹൻലാലിന്. മലയാള സിനിമയിൽ നിന്ന് ആദ്യമായാണ് ഒരു അഭിനേതാവിന് ഈ അംഗീകാരം ലഭിക്കുന്നത്. ഇന്ത്യൻ ചലച്ചിത്ര മേഖലയ്ക്ക് നൽകിയ സമഗ്ര സംഭാവനകൾ പരിഗണിച്ചാണ് ഈ പുരസ്‌കാരം. സ്വർണ്ണ കമലം, പതക്കം, ഷാൾ, 10 ലക്ഷം രൂപയുടെ ക്യാഷ് അവാർഡ് എന്നിവ അടങ്ങുന്നതാണ് പുരസ്കാരം.

മുൻപ് കേരളത്തിൽ നിന്ന് ചലച്ചിത്ര സംവിധായകൻ അടൂർ ഗോപാലകൃഷ്ണനും ഈ ബഹുമതി ലഭിച്ചിട്ടുണ്ട്. കഴിഞ്ഞ വർഷം ബോളിവുഡ് താരം മിഥുൻ ചക്രവർത്തിക്കായിരുന്നു പുരസ്‌കാരം. കേന്ദ്ര വാർത്താവിതരണ പ്രക്ഷേപണ മന്ത്രാലയം എക്‌സ് പ്ലാറ്റ്‌ഫോമിലൂടെയാണ് മോഹൻലാലിന് പുരസ്‌കാരം ലഭിച്ച വിവരം പ്രഖ്യാപിച്ചത്. ഒരു നടൻ, സംവിധായകൻ, നിർമ്മാതാവ് എന്നീ നിലകളിൽ മോഹൻലാൽ നൽകിയ സംഭാവനകളെ മന്ത്രാലയം അഭിനന്ദിച്ചു.

"അദ്ദേഹത്തിന്റെ അതുല്യമായ കഴിവ്, വൈദഗ്ദ്ധ്യം, അക്ഷീണമായ കഠിനാധ്വാനം എന്നിവ ഇന്ത്യൻ ചലച്ചിത്ര ചരിത്രത്തിൽ ഒരു സുവർണ്ണ നിലവാരം സ്ഥാപിച്ചു," എന്നും പ്രസ്താവനയിൽ പറയുന്നു. 2025 സെപ്റ്റംബർ 23 ന് നടക്കുന്ന 71-ാമത് ദേശീയ ചലച്ചിത്ര അവാർഡ് ദാന ചടങ്ങിൽ വെച്ച് പുരസ്‌കാരം സമ്മാനിക്കും.

ചരിത്രത്തിൽ ആദ്യമായി ദാദാസാഹേബ് ഫാൽക്കെ പുരസ്‌കാരം നേടിയത് 1969-ൽ നടി ദേവിക റാണിയാണ്. 2024 വരെ 54 പേർക്കാണ് ഈ പുരസ്‌കാരം ലഭിച്ചിട്ടുള്ളത്. നടന്മാരായ പൃഥ്വിരാജ് കപൂർ (1971), വിനോദ് ഖന്ന (2017) എന്നിവർക്ക് മരണാനന്തര ബഹുമതിയായിട്ടാണ് അവാർഡ് ലഭിച്ചത്.