തിരുവനന്തപുരം: സംസ്ഥാനത്തെ പോലീസ് അതിക്രമങ്ങൾ ന്യായീകരിച്ച് മുഖ്യമന്ത്രി പിണറായി വിജയൻ. ഒറ്റപ്പെട്ട ചില സംഭവങ്ങൾ മാത്രമാണ് ഇപ്പോൾ പുറത്തുവന്നതെന്നും, കുറ്റക്കാർക്കെതിരെ വിവരങ്ങളുടെ അടിസ്ഥാനത്തിൽ നടപടി സ്വീകരിക്കുമെന്നും മുഖ്യമന്ത്രി പറഞ്ഞു. ഇടതുമുന്നണി യോഗത്തിലാണ് മുഖ്യമന്ത്രി ഇക്കാര്യം വ്യക്തമാക്കിയത്.

ഏകദേശം 40 മിനിറ്റോളം സമയമെടുത്താണ് മുഖ്യമന്ത്രി പോലീസ് അതിക്രമങ്ങളെക്കുറിച്ച് വിശദീകരിച്ചത്. മുൻപ് നടന്ന ചില കാര്യങ്ങളെക്കുറിച്ച് ഇപ്പോൾ പരാതി ഉയരുന്നുണ്ടെന്നും ആരോപണ വിധേയരായ പോലീസുകാർക്കെതിരെ നടപടിയെടുത്ത് തുടങ്ങിയെന്നും അദ്ദേഹം പറഞ്ഞു.

സംസ്ഥാനത്തുടനീളം ഇത്തരം സംഭവങ്ങൾ നടക്കുന്നുണ്ടെന്ന് പറയുന്നത് ശരിയല്ലെന്നും, ഒറ്റപ്പെട്ട പരാതികളെ ചിലർ പെരുപ്പിച്ചു കാണിക്കാൻ ശ്രമിക്കുന്നുണ്ടെന്നും മുഖ്യമന്ത്രി ആരോപിച്ചു. തിരഞ്ഞെടുപ്പ് അടുക്കുന്ന സാഹചര്യത്തിലാണ് ഇത്തരം ശ്രമങ്ങൾ നടക്കുന്നതെന്നും അദ്ദേഹം സൂചിപ്പിച്ചു. പോലീസിന്റെ ഭാഗത്ത് നിന്ന് തെറ്റായ നടപടികൾ ഉണ്ടാകില്ലെന്നും മുഖ്യമന്ത്രി കൂട്ടിച്ചേർത്തു.