ബീഡി-ബിഹാർ പോസ്റ്റ് വിവാദത്തെ തുടർന്ന് കെപിസിസി സമൂഹ മാധ്യമങ്ങളുടെ ചുമതല വഹിച്ചിരുന്ന വി ടി ബൽറാം രാജിവെച്ചു. സംഭവത്തിൽ കെപിസിസി അധ്യക്ഷൻ സണ്ണി ജോസഫ് ബൽറാമിനോട് വിശദീകരണം തേടിയിരുന്നു. വിവാദങ്ങൾക്ക് പിന്നാലെ കോൺഗ്രസിന്റെ സോഷ്യൽ മീഡിയ വിങ് പുനഃസംഘടിപ്പിക്കാനും കെപിസിസി തീരുമാനിച്ചിട്ടുണ്ട്.
കോൺഗ്രസ് കേരള ഘടകത്തിന്റെ എക്സ് ഹാൻഡിലിൽ 'ബീഡിയും ബിഹാറും 'ബി'യിലാണ് തുടങ്ങുന്നത്, അതിനെ ഇനി പാപമായി കണക്കാക്കാനാവില്ല’ എന്ന പോസ്റ്റാണ് വലിയ വിവാദങ്ങൾക്ക് തിരികൊളുത്തിയത്. ഈ പോസ്റ്റ് തെറ്റായിപ്പോയെന്ന് കെപിസിസി അധ്യക്ഷൻ സണ്ണി ജോസഫ് വ്യക്തമാക്കി. പോസ്റ്റ് പിൻവലിച്ച് ഖേദം പ്രകടിപ്പിച്ച അദ്ദേഹം, ഇതിന് ഉത്തരവാദികളായ അഡ്മിനും ഓപ്പറേറ്റർമാർക്കും ജാഗ്രതക്കുറവും സൂക്ഷ്മതക്കുറവും സംഭവിച്ചുവെന്നും അറിയിച്ചു.
ഈ നിലപാട് കോൺഗ്രസിന്റേതല്ലെന്നും അത്തരത്തിൽ ഒരു പോസ്റ്റ് വന്നത് തെറ്റായിപ്പോയെന്നും അദ്ദേഹം കൂട്ടിച്ചേർത്തു. പോസ്റ്റിൽ സംഭവിച്ച പിഴവ് തിരുത്താൻ ആവശ്യമായ നിർദേശം നൽകിയിട്ടുണ്ടെന്നും സണ്ണി ജോസഫ് പറഞ്ഞു.