ശബരിമലയിലെ യുവതീപ്രവേശനം കഴിഞ്ഞുപോയ അധ്യായമാണെന്നും, പാർട്ടി വിശ്വാസികൾക്കൊപ്പമാണെന്നും സിപിഎം സംസ്ഥാന സെക്രട്ടറി എം.വി. ഗോവിന്ദൻ. വിശ്വാസികളുടെ നിലപാടുമായി ബന്ധപ്പെട്ടാണ് സിപിഎം പ്രവർത്തിക്കുന്നത്. ഒരു വിശ്വാസത്തിനും എതിരായ നിലപാട് ഇന്നലെയും എടുത്തിട്ടില്ല, നാളെയും എടുക്കില്ലെന്നും അദ്ദേഹം വ്യക്തമാക്കി.

അയ്യപ്പ സംഗമം നടത്താൻ തീരുമാനിച്ചത് ദേവസ്വം ബോർഡാണെന്ന് എം.വി. ഗോവിന്ദൻ പറഞ്ഞു. ലോകത്തിന്റെ വിവിധ ഭാഗങ്ങളിലുള്ള ഭക്തരുടെ ആവശ്യം പരിഗണിച്ചാണ് ഈ തീരുമാനമെടുത്തതെന്നും, ലോകമെമ്പാടുമുള്ള അയ്യപ്പ ഭക്തരുടെ പിന്തുണ ഈ സംഗമത്തിന് ലഭിച്ചിട്ടുണ്ടെന്നും അദ്ദേഹം കൂട്ടിച്ചേർത്തു. രാഷ്ട്രീയ താൽപ്പര്യങ്ങൾക്കായി മതത്തെയും വിശ്വാസത്തെയും ഉപയോഗിക്കുന്ന വർഗീയവാദികളാണ് ഈ വിഷയത്തിൽ വ്യത്യസ്ത നിലപാട് സ്വീകരിക്കുന്നതെന്നും അദ്ദേഹം വ്യക്തമാക്കി.

വർഗീയവാദികൾക്ക് വിശ്വാസമില്ലെന്നും, വിശ്വാസത്തെ ഒരു ഉപകരണമായി ഉപയോഗിക്കുന്നവരാണ് അവരെന്നും എം.വി. ഗോവിന്ദൻ പറഞ്ഞു. അവരുടെ പ്രചാരണങ്ങൾക്ക് ഒപ്പം നിൽക്കാൻ സിപിഎമ്മിന് താൽപര്യമില്ല. പാർട്ടി വിശ്വാസികൾക്കൊപ്പമാണ്. ശബരിമല യുവതീപ്രവേശന വിഷയം കോടതിവിധിയുമായി ബന്ധപ്പെട്ട പ്രശ്നമായിരുന്നു. ഇപ്പോൾ അതിലൂടെ കടന്നുപോകേണ്ട കാര്യമില്ല. അന്ന് സംഭവിച്ചതിനെക്കുറിച്ച് കൂടുതൽ ഒന്നും പറയാൻ ആഗ്രഹിക്കുന്നില്ലെന്നും അദ്ദേഹം പറഞ്ഞു.