കൊച്ചി: കേരളത്തിന്റെ സ്വപ്‌നപദ്ധതിയായ കോഴിക്കോട്-വയനാട് ഇരട്ട തുരങ്കപാതയുടെ നിർമ്മാണോദ്ഘാടനം മുഖ്യമന്ത്രി പിണറായി വിജയൻ നിർവഹിച്ചു. താമരശ്ശേരി ചുരത്തിലെ ഗതാഗതക്കുരുക്കിന് ഇത് ശാശ്വത പരിഹാരമാകുമെന്ന് മുഖ്യമന്ത്രി പറഞ്ഞു. തുരങ്കപാത പൂർത്തിയാകുമ്പോൾ ഇത് ഇന്ത്യയിലെ ഏറ്റവും ദൈർഘ്യമേറിയ മൂന്നാമത്തെ തുരങ്കപാതയായി മാറും.

"ജനങ്ങൾക്ക് സർക്കാരിൽ വിശ്വാസമുണ്ട്, നൽകിയ വാഗ്ദാനങ്ങൾ നടപ്പാക്കപ്പെടുമെന്ന ശുഭപ്രതീക്ഷ അവർക്കുണ്ട്. ഗതാഗതക്കുരുക്ക് കാരണം ബുദ്ധിമുട്ടുന്ന വയനാട്ടുകാരുടെ ദീർഘകാല സ്വപ്നമാണ് ഈ പദ്ധതി," മുഖ്യമന്ത്രി പറഞ്ഞു.

സാമ്പത്തിക മേഖലയ്ക്ക് വലിയ കുതിപ്പേകും

ഈ പദ്ധതി വയനാട്ടിലെയും കോഴിക്കോട്ടെയും വ്യാപാര, വാണിജ്യ, ടൂറിസം മേഖലയ്ക്ക് വലിയ ഉണർവ് നൽകും. ദേശീയ പാതാ വികസനവും ഗെയിൽ പദ്ധതിയും പോലെ അസാധ്യമെന്ന് കരുതിയ പല പദ്ധതികളും കേരളത്തിൽ നടപ്പാക്കിയെന്ന് മുഖ്യമന്ത്രി ചൂണ്ടിക്കാട്ടി. കിഫ്ബിയുടെ സഹായത്തോടെ 90,000 കോടിയുടെ പദ്ധതികളാണ് കേരളത്തിൽ നടപ്പാക്കിയത്. "കിഫ്ബിയെ തകർക്കാൻ പല ശ്രമങ്ങളും നടന്നു. എന്നാൽ അത് പരാജയപ്പെട്ടതോടെ വിവിധ പദ്ധതികൾ തകർക്കാൻ ശ്രമം നടക്കുന്നു," മുഖ്യമന്ത്രി കൂട്ടിച്ചേർത്തു.

അസാധ്യമായത് സാധ്യമാക്കിയ സർക്കാർ

കഴിഞ്ഞ ഒമ്പത് വർഷം കേരളം ഭരിച്ച സർക്കാർ അസാധ്യമായ പലതും സാധ്യമാക്കിയെന്ന് മന്ത്രി പി.എ. മുഹമ്മദ് റിയാസ് പറഞ്ഞു. ഈ തുരങ്കപാത സംസ്ഥാനത്തിന്റെ ടൂറിസം മേഖലയ്ക്കും മൊത്തം വികസനത്തിനും വലിയ സംഭാവന നൽകും.

തറക്കല്ലിടലിൽ ഒതുങ്ങില്ലെന്ന് ധനമന്ത്രി

ധനമന്ത്രി കെ.എൻ. ബാലഗോപാൽ ഈ പദ്ധതി കിഫ്ബിയുടെ കരുത്ത് വ്യക്തമാക്കുന്നു എന്ന് പറഞ്ഞു. ഇടതുസർക്കാർ കേവലം തറക്കല്ലിടലിൽ മാത്രം ഒതുങ്ങില്ല. "കരാർ ഉറപ്പിച്ച് അന്തിമ അനുമതി നൽകി പ്രവൃത്തി ഉറപ്പാക്കുന്ന സർക്കാരാണിത്. തറക്കല്ല് ഇട്ടശേഷം പദ്ധതി നിലച്ചുപോകരുത് എന്ന നിർബന്ധം ഞങ്ങൾക്കുണ്ട്," ധനമന്ത്രി വ്യക്തമാക്കി.