യൂത്ത് കോൺഗ്രസ് നേതാക്കളായ ഷാഫി പറമ്പിൽ എംപിയുടേയും രാഹുൽ മാങ്കൂട്ടത്തിൽ എംഎൽഎയുടേയും സാമ്പത്തിക ഇടപാടുകളെ കുറിച്ച് അന്വേഷിക്കണമെന്ന് എഐവൈഎഫ്. ഇത് സംബന്ധിച്ച് ഡിജിപിക്ക് പരാതി നൽകി എഐവൈഎഫ് സംസ്ഥാന സെക്രട്ടറി ടി.ടി. ജിസ്‌മോൻ. ഇരുവരുടെയും സാമ്പത്തിക ഇടപാടുകളെക്കുറിച്ച് അന്വേഷിക്കണമെന്നാണ് പരാതിയിലെ പ്രധാന ആവശ്യം. രാഷ്ട്രീയ സ്വാധീനമുപയോഗിച്ച് ഇവർ അനധികൃത പ്രവർത്തനങ്ങൾ നടത്തുന്നതായി പരാതിയിൽ ആരോപിക്കുന്നു.

പരാതിയിലെ പ്രധാന ആരോപണങ്ങൾ:

പാലക്കാട് ഉപതിരഞ്ഞെടുപ്പിലെ പണമിടപാട്: പാലക്കാട് നിയമസഭാ ഉപതിരഞ്ഞെടുപ്പ് വേളയിൽ ട്രോളി ബാഗിൽ പണം കടത്തിയെന്ന ആരോപണം നേരിട്ടിരുന്നു.

വയനാട് ദുരിതാശ്വാസ ഫണ്ട്: വയനാട് ദുരന്തബാധിതർക്ക് സഹായം നൽകുന്നതിനായി യൂത്ത് കോൺഗ്രസ് പിരിച്ച 2.40 കോടി രൂപയുടെ ഫണ്ടിൽ വലിയ തട്ടിപ്പ് നടന്നതായി ആരോപണം. ദുരിതബാധിതർക്ക് നൽകുമെന്ന് രാഹുൽ മാങ്കൂട്ടത്തിൽ വാഗ്ദാനം ചെയ്തിരുന്ന ഈ ഫണ്ടിന്റെ കണക്കുകൾ സംബന്ധിച്ച് പാർട്ടിയിൽത്തന്നെ വിമർശനങ്ങൾ ഉയർന്നപ്പോൾ കൃത്യമായ മറുപടി നൽകാൻ നേതൃത്വം തയ്യാറായില്ല. പിരിച്ചെടുത്ത 2.40 കോടിയിൽ 88 ലക്ഷം രൂപ മാത്രമാണ് സംസ്ഥാന കമ്മിറ്റിയുടെ അക്കൗണ്ടിലെത്തിയതെന്നാണ് രാഹുൽ മാങ്കൂട്ടത്തിൽ പറഞ്ഞതത്രെ.

അഴിമതി നിരോധന നിയമം: വയനാട് ഫണ്ടുമായി ബന്ധപ്പെട്ട് നടന്നത് ഗുരുതരമായ സാമ്പത്തിക തിരിമറിയാണെന്നും, ഇത് 1988-ലെ അഴിമതി തടയൽ നിയമപ്രകാരമുള്ള കുറ്റകൃത്യമാണെന്നും അതിനാൽ കേസ് എടുക്കണമെന്നും പരാതിയിൽ ആവശ്യപ്പെടുന്നു.

അനധികൃത സാമ്പത്തിക വളർച്ച: ഷാഫി പറമ്പിലിന്റെയും രാഹുൽ മാങ്കൂട്ടത്തിലിന്റെയും സാമ്പത്തിക സ്രോതസ്സുകൾ അടിയന്തരമായി പരിശോധിക്കണം. കോൺഗ്രസ് പ്രവർത്തകർതന്നെ എഐസിസിക്ക് ഇതേക്കുറിച്ച് പരാതി നൽകിയിട്ടുണ്ടെന്നും, മാധ്യമപ്രവർത്തകരുടെ ചോദ്യങ്ങളോട് ആരോപണങ്ങൾ നിഷേധിക്കാൻ ഇവർ തയ്യാറായില്ലെന്നതും ശ്രദ്ധേയമാണ്.

രാഷ്ട്രീയ സ്വാധീനവും പണവും ഉപയോഗിച്ച് ഈ വിഷയങ്ങൾ ഒതുക്കിത്തീർക്കാൻ ശ്രമിക്കുന്നതായും പരാതിയിൽ ആരോപണമുണ്ട്.