തിരുവനന്തപുരം: പാലക്കാട് സി.പി.എം ജില്ലാ സെക്രട്ടേറിയറ്റ് അംഗമായിരുന്ന പി.കെ. ശശിക്കെതിരായ ലൈംഗിക ആരോപണത്തിൽ 'തീവ്രത' എന്ന വാക്ക് താൻ ഉപയോഗിച്ചിട്ടില്ലെന്ന് സി.പി.എം. കേന്ദ്ര കമ്മിറ്റി അംഗം പി.കെ. ശ്രീമതി. നിയമസഭയിൽ ഈ വിഷയം ചർച്ചയ്ക്ക് വന്നപ്പോൾ മറ്റാരോ ഉപയോഗിച്ച വാക്ക് പിന്നീട് പത്രങ്ങളിൽ വന്നതാണെന്നും, പാർട്ടി റിപ്പോർട്ടിൽ അത്തരമൊരു വാക്ക് ഇല്ലെന്നും അവർ വ്യക്തമാക്കി. ആരോപണം ഉയർന്നപ്പോൾ തന്നെ പി.കെ. ശശിയെ എല്ലാ തിരഞ്ഞെടുക്കപ്പെട്ട സ്ഥാനങ്ങളിൽ നിന്നും നീക്കിയിരുന്നു എന്നും ശ്രീമതി കൂട്ടിച്ചേർത്തു.
അതേസമയം, രാഹുൽ മാങ്കൂട്ടത്തിൽ എം.എൽ.എ. സ്ഥാനത്ത് തുടരാൻ യോഗ്യനല്ലെന്നും, അദ്ദേഹത്തെ രാജിവെപ്പിക്കാൻ കോൺഗ്രസ് നേതൃത്വം തയ്യാറാവണമെന്നും പി.കെ. ശ്രീമതി ആവശ്യപ്പെട്ടു. രാഹുലിന്റെ അഹങ്കാരവും ധിക്കാരവും അതിരുകടന്നെന്നും, അപമാനഭാരം കാരണമാണ് കൂടുതൽ സ്ത്രീകൾ പരാതി നൽകാൻ മുന്നോട്ട് വരാത്തതെന്നും അവർ വിമർശിച്ചു.
പെൺകുട്ടികളെ വലയിലാക്കി വലിച്ചെറിയുന്നതാണ് രാഹുലിന്റെ ശൈലിയെന്നും ശ്രീമതി ആരോപിച്ചു. കേരളത്തിൽ ഇത്രയും മോശമായ ഒരു കേസ് ഉണ്ടായിട്ടും സോണിയാ ഗാന്ധിയോ പ്രിയങ്കാ ഗാന്ധിയോ എന്തുകൊണ്ട് പ്രതികരിക്കുന്നില്ലെന്നും അവർ ചോദിച്ചു. തങ്ങളുടെ പാർട്ടിക്കുള്ളിൽ സമാനമായ വിഷയത്തിൽ സി.പി.എം. സ്വീകരിച്ച കർശന നടപടികളും ശ്രീമതി ഓർമ്മിപ്പിച്ചു. രാഹുലിനെതിരായ വിവാദത്തിൽ പ്രതികരിച്ചതിന് തനിക്കെതിരെ രൂക്ഷമായ സൈബർ ആക്രമണം നടക്കുകയാണെന്നും പി.കെ. ശ്രീമതി കൂട്ടിച്ചേർത്തു.