പാലക്കാട് എം.എൽ.എ. രാഹുൽ മാങ്കൂട്ടത്തിലിനെതിരായ ആരോപണങ്ങളും പരാതികളും ദിനംപ്രതി ഉയരുകയാണ്. അതിനിടയിൽ രാഹുലിനെ കൂടുതൽ പ്രതിസന്ധിയിലാക്കിക്കൊണ്ട് ഒരു യുവതിയെ ഗർഭഛിദ്രത്തിന് നിര്‍ബന്ധിക്കുന്ന അദ്ദേഹത്തിന്റേതെന്ന തരത്തിൽ ഒരു ഓഡിയോ ആണ് ഇപ്പോൾ പുറത്തുവന്നിരിക്കുന്നത്. ടെലിഫോൺ സംഭാഷണത്തിന്റെ ഓഡിയോ ക്ലിപ്പാണ് പുറത്തായിരിക്കുന്നത്. സംഭാഷണത്തിൽ കുഞ്ഞിനെ താൻ ഇല്ലാതാക്കില്ലെന്നും അവർ വളർത്തിക്കോളാമെന്നും പറയുമ്പോൾ രാഹുൽ ഭീഷണിപ്പെടുത്തുന്നതും അസഭ്യം പറയുന്നതുമാണ് ഓഡിയോയിലൂടെ കേൾക്കുന്നത്.
യുവതിയെ നേരിൽ കാണണമെന്ന് രാഹുൽ ആവശ്യപ്പെടുമ്പോൾ, "സ്നേഹം കൊണ്ടല്ല വിളിക്കുന്നതെന്ന് അറിയാം, എന്തെങ്കിലും കലക്കിത്തന്ന് കൊല്ലാനാണോ?" എന്ന് യുവതി തിരിച്ച് ചോദിക്കുന്നു. ഇതിന് മറുപടിയായി "കൊല്ലാനാണെങ്കിൽ എത്ര സെക്കൻഡ് വേണമെന്ന് അറിയാമോ?" എന്ന് രാഹുൽ ചോദിക്കുന്നതും ഓഡിയോയിൽ വ്യക്തമായി കേൾക്കാം. ഈ ശബ്ദരേഖ പുറത്തുവന്നതോടെ രാഹുൽ മാങ്കൂട്ടത്തിൽ കൂടുതൽ പ്രതിരോധത്തിലായിരിക്കുകയാണ്.