കൊച്ചി: താര സംഘടനയായ അമ്മയുടെ തിരഞ്ഞെടുപ്പ് ഫലം വന്നതിനു പിന്നാലെ പ്രതികരണവുമായി നടൻ ദേവൻ. അമ്മയിൽ ഇപ്പോൾ ജനാധിപത്യം വന്നു എന്നും, അമ്മ ജനകീയമായിയെന്നും ദേവൻ പ്രതികരിച്ചു. ആരെങ്കിലും മാറിത്തരുന്ന സീറ്റിലേക് വരേണ്ടവർ അല്ല സ്ത്രീകൾ. അവർ പൊരുതി തന്നെ വിജയിക്കണം. ഇന്ന് സംഭവിച്ചതും അത് തന്നെയാണെന്ന് നടൻ മനോരമ ന്യൂസിനോട് പറഞ്ഞു.

സംഘടനയുടെ തലപ്പത്തേക്ക് സ്ത്രീകൾ വരണമെന്ന തന്റെ ആഗ്രഹം സഫലമായി. ജയപരാജയങ്ങൾ വിഷയമല്ലെന്നും അമ്മയിൽ പരിഷ്കാരങ്ങൾ വരേണ്ടതിനായി പുതിയ ടീമിനൊപ്പം നിന്നുകൊണ്ട് താനും പ്രവർത്തിക്കുമെന്ന് നടൻ വ്യക്തമാക്കി. അമ്മ സംഘടനയുടെ പ്രസിഡന്റായി തിരഞ്ഞെടുക്കപ്പെട്ടത് നടി ശ്വേത മേനോൻ ആണ്.

ചരിത്രത്തിലാദ്യമായാണ് അമ്മ സംഘടനയുടെ തലപ്പത്തേക്ക് ഒരു വനിത എത്തുന്നത്. തിരഞ്ഞെടുപ്പിൽ എതിർ സ്ഥാനാർത്ഥിയായിരുന്നത് നടൻ ദേവൻ ആയിരുന്നു. ശ്വേതയ്ക്ക് 159 വോട്ടും ദേവന് 132 വോട്ടുമാണ് ലഭിച്ചത്. ജനറൽ സെക്രട്ടറിയായി കുക്കു പരമേശ്വരൻ ആണ് തിരഞ്ഞെടുക്കപ്പെട്ടത്.