എയർ ഇന്ത്യ അന്താരാഷ്ട്ര വിമാന സർവീസുകൾ വെട്ടിക്കുറയ്ക്കും. വ്യോമയാന ടർബൈൻ ഇന്ധന വിലയിലെ കുത്തനെയുള്ള വർധനവും വ്യോമാതിർത്തിയിലെ നിലവിലുള്ള നിയന്ത്രണങ്ങളും നിരവധി റൂട്ടുകളെ ലാഭകരമല്ലാതാക്കിയതിനാലാണ് നീക്കം. ജൂൺ, ജൂലൈ മാസങ്ങളിലാണ് ഈ മാറ്റം.
വർദ്ധിച്ചുവരുന്ന വെല്ലുവിളികൾക്കിടയിൽ, ജൂൺ, ജൂലൈ മാസങ്ങളിലെ ഷെഡ്യൂളുകൾ കുറയ്ക്കുകയല്ലാതെ മറ്റ് മാർഗമില്ലെന്ന് എയർ ഇന്ത്യ സിഇഒയും മാനേജിംഗ് ഡയറക്ടറുമായ കാംബെൽ വിൽസൺ ജീവനക്കാരോട് പറഞ്ഞു. ജെറ്റ് ഇന്ധന വിലയിലെ വൻ വർധന, വ്യോമമേഖല അടച്ചുപൂട്ടൽ, ദീർഘദൂര പറക്കൽ റൂട്ടുകൾ എന്നിവ കാരണം ഏപ്രിൽ, മെയ് മാസങ്ങളിൽ എയർലൈൻ ഇതിനകം തന്നെ ചില സർവീസുകൾ കുറച്ചിട്ടുണ്ട്.
ജെറ്റ് ഇന്ധന വിലയിലെ കുത്തനെയുള്ള വർദ്ധനവ് പ്രവർത്തനങ്ങളെ ബുദ്ധിമുട്ടിക്കുകയും ചെലവ് വർദ്ധിപ്പിക്കുകയും ചെയ്യുന്നതിനാൽ ഇന്ത്യയിലെ വ്യോമയാന വ്യവസായം സർക്കാർ അടിയന്തര ഇടപെടൽ ആവശ്യപ്പെട്ടതിന് ദിവസങ്ങൾക്ക് ശേഷമാണ് ഈ നീക്കം. എയർ ഇന്ത്യ , ഇൻഡിഗോ , സ്പൈസ് ജെറ്റ് തുടങ്ങിയ വിമാനക്കമ്പനികളെ പ്രതിനിധീകരിക്കുന്ന ഫെഡറേഷൻ ഓഫ് ഇന്ത്യൻ എയർലൈൻസ് സിവിൽ ഏവിയേഷൻ മന്ത്രാലയത്തിന് അയച്ച കത്തിൽ, കുതിച്ചുയരുന്ന വ്യോമയാന ടർബൈൻ ഇന്ധന വിലകൾ കാരണം ഈ മേഖല അങ്ങേയറ്റത്തെ സമ്മർദ്ദം നേരിടുന്നുവെന്ന് മുന്നറിയിപ്പ് നൽകി.