കൽപ്പറ്റയിലെ ഉരുൾപൊട്ടൽ ദുരന്തബാധിതർക്കായി സർക്കാർ നിർമ്മിച്ച ടൗൺഷിപ്പിലെ ആദ്യഘട്ട വീടുകൾ മുഖ്യമന്ത്രി പിണറായി വിജയൻ ജനങ്ങൾക്ക് സമർപ്പിച്ചു. പദ്ധതിയുടെ ഭാഗമായുള്ള 178 വീടുകളുടെ താക്കോൽദാനവും ഈ കുടുംബങ്ങൾക്കുള്ള പട്ടയമുൾപ്പെടെയുള്ള രേഖകളുടെ കൈമാറ്റവും ചടങ്ങിൽ നടന്നു.

രണ്ട് മുറികളുള്ള 1000 ചതുരശ്ര അടി വിസ്തീർണ്ണമുള്ള വീടും 7 സെന്റ് ഭൂമിയുമാണ് ഓരോ കുടുംബത്തിനും നൽകുന്നത്. മന്ത്രിമാരും പ്രതിപക്ഷ അംഗങ്ങളും പങ്കെടുത്ത ഈ ചടങ്ങിൽ കൽപ്പറ്റ ജനറൽ ആശുപത്രിയിലെ അനക്സ് ബ്ലോക്കിന്റെ നിർമ്മാണ ഉദ്ഘാടനവും മുഖ്യമന്ത്രി നിർവ്വഹിച്ചു.

രാവിലെ 11 മണിക്ക് കൽപ്പറ്റ ബൈപ്പാസ് റൗണ്ടിലെ ടൗൺഷിപ്പിൽ വെച്ചാണ് ഉദ്ഘാടന ചടങ്ങുകൾ ആരംഭിച്ചത്. പരിപാടിയോടനുബന്ധിച്ച് താമരശ്ശേരി ചുരത്തിൽ ഭാരവാഹനങ്ങൾക്ക് നിയന്ത്രണം ഏർപ്പെടുത്തിയിട്ടുണ്ട്.