77-ാമത് റിപ്പബ്ലിക് ദിനത്തോടനുബന്ധിച്ച് പ്രഖ്യാപിച്ച പത്മ പുരസ്കാരങ്ങളിൽ കേരളത്തിന് അഭിമാനകരമായ നേട്ടം. അന്തരിച്ച മുൻ മുഖ്യമന്ത്രി വി.എസ്. അച്യുതാനന്ദൻ, സുപ്രീം കോടതി മുൻ ജസ്റ്റിസ് കെ.ടി. തോമസ്, ജന്മഭൂമി മുൻ പത്രാധിപർ പി. നാരായണൻ എന്നിവർക്ക് രാജ്യത്തെ രണ്ടാമത്തെ ഉയർന്ന സിവിലിയൻ ബഹുമതിയായ പത്മവിഭൂഷൺ ലഭിച്ചു. ബോളിവുഡ് താരം ധർമ്മേന്ദ്ര, പ്രശസ്ത വയലിനിസ്റ്റ് എൻ. രാജം എന്നിവരുൾപ്പെടെ അഞ്ചുപേർക്കാണ് ഇത്തവണ പത്മവിഭൂഷൺ ലഭിച്ചത്.
മലയാളത്തിന്റെ മെഗാസ്റ്റാർ മമ്മൂട്ടിയും എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശനും പത്മഭൂഷൺ പുരസ്കാരത്തിന് അർഹരായി. 1998-ൽ പത്മശ്രീ നൽകി ആദരിക്കപ്പെട്ട മമ്മൂട്ടിക്ക് ഇത് കരിയറിലെ മറ്റൊരു വലിയ അംഗീകാരമാണ്. അൽക യാഗ്നിക്, ഉദയ് കോഡക്, വിജയ് അമൃത്രാജ് തുടങ്ങി 13 പേർക്കാണ് ഇത്തവണ പത്മഭൂഷൺ പ്രഖ്യാപിച്ചിരിക്കുന്നത്.
കേരളത്തിൽ നിന്ന് മൂന്ന് പേർ പത്മശ്രീ പുരസ്കാരത്തിനും അർഹരായി. ശാസ്ത്രമേഖലയിലെ സംഭാവനകൾക്ക് എ.ഇ. മുത്തുനായകം, കലാവിഭാഗത്തിൽ കലാമണ്ഡലം വിമല മേനോൻ, സാമൂഹ്യപ്രവർത്തനത്തിൽ പരിസ്ഥിതി പ്രവർത്തക കൊല്ലക്കൽ ദേവകിയമ്മ എന്നിവർക്കാണ് പത്മശ്രീ ലഭിച്ചത്. ഇന്ത്യൻ ക്രിക്കറ്റ് ടീം മുൻ നായകൻ രോഹിത് ശർമ്മ, നടൻ മാധവൻ, കെ. വിജയകുമാർ എന്നിവരും പത്മശ്രീ പട്ടികയിൽ ഇടംപിടിച്ചു. വിവിധ മേഖലകളിൽ നൽകിയ സമാനതകളില്ലാത്ത സേവനങ്ങളെ മുൻനിർത്തിയാണ് രാജ്യം ഇവർക്ക് ആദരം നൽകുന്നത്.