രാഹുൽ മാങ്കൂട്ടത്തിലിനെതിരെ പരാതി നൽകിയ യുവതിയുടെ സൈബർ അധിക്ഷേപ പരാതിയിൽ രാഹുൽ ഈശ്വർ പോലീസ് കസ്റ്റഡിയിൽ. ചോദ്യം ചെയ്യാൻ വിളിപ്പിച്ചതിന് പിന്നാലെയാണ് പോലീസ് ഇദ്ദേഹത്തെ കസ്റ്റഡിയിലെടുത്തത്. തുടർന്ന് രാഹുൽ ഈശ്വറിനെ എആർ ക്യാമ്പിലേക്ക് കൊണ്ടുപോയി. അതിജീവിതയുടെ ഐഡന്റിറ്റി വെളിപ്പെടുത്താൻ ശ്രമിച്ചു എന്നതാണ് രാഹുൽ ഈശ്വറിനെതിരായ പ്രധാന കുറ്റം.
സൈബർ പോലീസാണ് ചോദ്യം ചെയ്യുന്നതിനായി രാഹുൽ ഈശ്വറിനെ വിളിപ്പിച്ചത്. രാഹുൽ ഈശ്വർ ഉൾപ്പെടെ നാല് പേരുടെ യുആർഎൽ (യൂണിഫോം റിസോഴ്സ് ലൊക്കേറ്റർ) ആണ് പരാതിക്കാരി പോലീസിന് സമർപ്പിച്ചത്. ഇത് വിശദമായി പരിശോധിച്ച ശേഷമാണ് പോലീസ് തുടർനടപടികളിലേക്ക് കടന്നത്. കോൺഗ്രസ് നേതാവായ സന്ദീപ് വാര്യരുടേയും മറ്റ് രണ്ട് വനിതകളുടേയും ഉൾപ്പെടെയുള്ള യുആർഎല്ലുകൾ അടങ്ങിയ പരാതിയിലാണ് ഇപ്പോൾ നിർണായകമായ ഈ പോലീസ് നീക്കം ഉണ്ടായിരിക്കുന്നത്.