കോഴിക്കോട്: അനാശാസ്യത്തിന് കസ്റ്റഡിയിലെടുത്ത യുവതിയെ പീഡിപ്പിച്ച സംഭവത്തിൽ വടകര ഡിവൈഎസ്പി എ. ഉമേഷിനെ സസ്‌പെൻഡ് ചെയ്തു. പോലീസ് പദവി ദുരുപയോഗം ചെയ്തുവെന്നും ഗുരുതരമായ കുറ്റകൃത്യമാണ് ഉമേഷിൻ്റെ ഭാഗത്തുനിന്നുണ്ടായതെന്നും ആഭ്യന്തരവകുപ്പിന്റെ സസ്‌പെൻഷൻ ഉത്തരവിൽ പറയുന്നു. സംസ്ഥാന പോലീസ് മേധാവിയുടെ ശുപാർശയുടെ അടിസ്ഥാനത്തിലാണ് ആഭ്യന്തര വകുപ്പ് നടപടി സ്വീകരിച്ചത്.
ഉമേഷ് വടക്കഞ്ചേരി സിഐ ആയിരുന്ന 2014-ൽ, അനാശാസ്യത്തിന് പിടികൂടിയ യുവതിയെ കേസിൽ നിന്ന് ഒഴിവാക്കാമെന്ന് പറഞ്ഞ് ഭീഷണിപ്പെടുത്തി പീഡിപ്പിച്ചു എന്നതാണ് കേസിനാസ്പദമായ സംഭവം. ചെർപ്പുളശ്ശേരി സിഐ ബിനു തോമസിന്റെ ആത്മഹത്യാക്കുറിപ്പിലാണ് ഉമേഷിനെതിരെയുള്ള ആരോപണം ആദ്യമായി പുറത്തുവന്നത്. തുടർന്ന് പാലക്കാട് ക്രൈംബ്രാഞ്ച് നടത്തിയ അന്വേഷണത്തിൽ യുവതിയുടെ മൊഴി രേഖപ്പെടുത്തുകയും, ഡിവൈഎസ്പി വീട്ടിലെത്തി ഭീഷണിപ്പെടുത്തി പീഡിപ്പിച്ചുവെന്ന മൊഴി സ്ഥിരീകരിക്കുകയും ചെയ്തു.
അന്വേഷണ റിപ്പോർട്ടിൻ്റെ അടിസ്ഥാനത്തിൽ ഉമേഷിനെതിരെ നിയമപരമായ നടപടിയെടുക്കാൻ ഡിജിപി ആഭ്യന്തര വകുപ്പിന് റിപ്പോർട്ട് കൈമാറിയിരുന്നു. സസ്‌പെൻഷൻ ഉത്തരവ് പുറത്തിറങ്ങുന്നതിന് തൊട്ടുമുമ്പ് ഇസിജിയിൽ വ്യതിയാനം വന്നതിനെ തുടർന്ന് മെഡിക്കൽ അവധിയിൽ പ്രവേശിക്കുകയാണെന്ന് ഉമേഷ് അറിയിച്ചിരുന്നു. നാദാപുരം കൺട്രോൾ റൂം ഡിവൈഎസ്പിക്കാണ് വടകര ഡിവൈഎസ്പിയുടെ പകരം ചുമതല നൽകിയിരിക്കുന്നത്.