കോഴിക്കോട്: കോഴിക്കോട് ബേബി മെമ്മോറിയൽ ആശുപത്രിയിൽ തീപ്പിടിത്തം. ആളപായമില്ലെന്നും തീ നിയന്ത്രണവിധേയമാക്കിയതായും ബന്ധപ്പെട്ട അധികൃതർ അറിയിച്ചു. ശനിയാഴ്ച രാവിലെ 9:45 ഓടെയാണ് ആശുപത്രിയിലെ സി ബ്ലോക്കിൽ തീ പടർന്നത്. ഒമ്പതാം നിലയിലുള്ള എസി പ്ലാന്റിനാണ് തീ പിടിച്ചത്. അഗ്നിശമന സേനയെത്തി മറ്റു ഭാഗങ്ങളിലേക്ക് തീ പടരുന്ന സാഹചര്യം ഒഴിവാക്കി തീ നിയന്ത്രണ വിധേയമാക്കി. താഴത്തെ നിലകളിൽ ഉണ്ടായിരുന്ന രോഗികളെ ഒഴിപ്പിച്ചു. തീപ്പിടിത്തത്തിന്റെ കാരണം വ്യക്തമല്ല.

പുതിയ ബ്ലോക്കിന്റെ ഒൻപതാം നിലയിലെ എസി പ്ലാന്റിനായിരുന്നു തീപ്പിടിത്തം, ഈ നിലയിൽ രോഗികളെ പാർപ്പിച്ചിരുന്നില്ല. തീ നിയന്ത്രണ വിധേയമാക്കിയ ശേഷം, അഗ്നിരക്ഷാ ഉദ്യോഗസ്ഥർ പുക കെടുത്തുന്നതിനുള്ള നടപടികൾ തുടരുകയാണ്. തീപ്പിടുത്തം എസി പ്ലാന്റിനായിരുന്നുവെങ്കിലും, ഇതിന് തൊട്ടുതാഴെയുള്ള നിലകളിൽ ചികിത്സയ്ക്കായി അഡ്മിറ്റ് ചെയ്ത രോഗികൾ ഉണ്ടായിരുന്നു. സർജറി അടക്കം കഴിഞ്ഞ രോഗികളെ മാറ്റാനുള്ള നടപടികൾ പ്രയാസമില്ലാതെ പൂർത്തിയാക്കിയതായി ആശുപത്രി അധികൃതർ അറിയിച്ചു. തീപ്പിടിത്തത്തെ തുടർന്ന് പുക താഴെയുള്ള നിലകളിലേക്ക് എത്താൻ തുടങ്ങിയതിനാൽ ആശുപത്രിയുടെ പ്രവർത്തനത്തെയും ബാധിച്ചിട്ടുണ്ട്.