തിരുവനന്തപുരം: ബലാത്സംഗ കേസിൽ പ്രതിയായ രാഹുൽ മാങ്കൂട്ടത്തിൽ എം.എൽ.എ. തിരുവനന്തപുരം ജില്ലാ കോടതിയിൽ മുൻകൂർ ജാമ്യാപേക്ഷ നൽകി. തനിക്കെതിരെയുള്ള ആരോപണങ്ങൾ എല്ലാം നിഷേധിച്ചുകൊണ്ടാണ് രാഹുൽ ഹർജി സമർപ്പിച്ചിരിക്കുന്നത്. പരാതിക്കാരിയായ യുവതിയുമായി തനിക്ക് ദീർഘകാലമായി സൗഹൃദമുണ്ട് എന്ന് ഹർജിയിൽ പറയുന്നു. യുവതി ആരോപിക്കുന്നതുപോലെ ബലാത്സംഗം ചെയ്തിട്ടില്ലെന്നും, ഗർഭഛിദ്രം ഉൾപ്പെടെയുള്ള ആരോപണങ്ങൾ കെട്ടിച്ചമച്ചതാണെന്നും രാഹുൽ വാദിക്കുന്നു. താൻ അന്വേഷണവുമായി സഹകരിക്കുമെന്നും, അതിനാൽ ജാമ്യം അനുവദിക്കണമെന്നുമാണ് ആവശ്യം. ഹർജി നാളെ പരിഗണിക്കാനാണ് സാധ്യത.

തനിക്കെതിരായ നീക്കം രാഷ്ട്രീയപ്രേരിതമാണെന്ന് രാഹുൽ ജാമ്യഹർജിയിൽ ആരോപിച്ചു. പരാതിക്കാരിയുടെയും ഭർത്താവിൻ്റെയും രാഷ്ട്രീയബന്ധം ചൂണ്ടിക്കാട്ടി തനിക്കെതിരായ നീക്കം ബിജെപി-സിപിഎം ഗൂഢാലോചനയുടെ ഭാഗമാണെന്ന് രാഹുൽ വ്യക്തമാക്കുന്നു. യുവതിയാണ് സമൂഹമാധ്യമങ്ങൾ വഴി തന്നെ ബന്ധപ്പെട്ട് സൗഹൃദം സ്ഥാപിച്ചത്. ഭർത്താവ് തന്നെ ഗാർഹികമായി പീഡിപ്പിക്കുന്നുവെന്ന് യുവതി പറഞ്ഞപ്പോൾ അനുകമ്പ തോന്നുകയായിരുന്നു. ഈ ബന്ധമാണ് പിന്നീട് ഉഭയസമ്മതത്തോടെയുള്ള ശാരീരികബന്ധത്തിലേക്ക് വളർന്നത്. യുവതി വിദ്യാസമ്പന്നയും ബന്ധത്തിലെ ശരിതെറ്റുകൾ അറിയാവുന്ന വ്യക്തിയുമാണ്. താനാണ് ഗർഭിണിയാക്കിയതെന്ന ആരോപണം തെറ്റാണെന്നും രാഹുൽ ജാമ്യഹർജിയിൽ പറയുന്നു.