ഹോങ്കോങ്: ഹോങ്കോങ്ങിലെ തായ് പോ ജില്ലയിലെ ഒരു ഫ്ലാറ്റ് സമുച്ചയത്തിൽ വൻ തീപിടിത്തം. അപകടത്തിൽ 13 പേർക്ക് ജീവൻ നഷ്ടപ്പെട്ടതായി ഹോങ്കോങ് ഫയർ സർവീസസ് ഡിപ്പാർട്ട്‌മെൻ്റ് അറിയിച്ചു. തീപിടിത്തത്തിൽ 15-ൽ അധികം ആളുകൾക്ക് പരിക്കേൽക്കുകയും ചെയ്തിട്ടുണ്ട്.വാങ് ഫുക് കോർട്ട് എന്ന സർക്കാർ സബ്‌സിഡിയുള്ള റസിഡൻഷ്യൽ കോംപ്ലക്‌സിലാണ് തീപിടിത്തമുണ്ടായത്. ഒൻപത് പേർ സംഭവസ്ഥലത്തും ആശുപത്രിയിൽ എത്തിച്ച നാല് പേരും മരിച്ചതായി അധികൃതർ അറിയിച്ചു. പരിക്കേറ്റവരിൽ ചിലരുടെ നില ഗുരുതരമാണ്. മരിച്ചവരിൽ ഒരു അഗ്നിശമന സേനാംഗവും ഉൾപ്പെടുന്നു.
പുതുക്കിപ്പണിയുന്നതിനായി കെട്ടിടത്തിന് പുറത്ത് സ്ഥാപിച്ചിരുന്ന മുളകൊണ്ടുള്ള സ്കഫോൾഡിംഗിലൂടെയും (ബാംബൂ സ്കഫോൾഡിംഗ്) നിർമ്മാണ വലകളിലൂടെയും തീ വളരെ വേഗത്തിൽ പല നിലകളിലേക്കും സമീപത്തെ കെട്ടിടങ്ങളിലേക്കും പടർന്നതാണ് ദുരന്തത്തിൻ്റെ വ്യാപ്തി വർദ്ധിപ്പിച്ചത്. ഏകദേശം ഉച്ചയ്ക്ക് ശേഷമാണ് തീപിടിത്തം റിപ്പോർട്ട് ചെയ്തത്. തീവ്രതയുടെ അടിസ്ഥാനത്തിൽ ഫയർ അലാറം ലെവൽ 5-ലേക്ക് ഉയർത്തി.
തീ നിയന്ത്രിക്കാനുള്ള ശ്രമങ്ങൾ രാത്രി വൈകിയും തുടരുകയാണ്. ക്ഷേത്രത്തിനുള്ളിൽ താപനില വളരെ ഉയർന്ന നിലയിൽ തുടരുന്നതും, കെട്ടിടങ്ങളിൽ നിന്ന് അവശിഷ്ടങ്ങൾ താഴേക്ക് വീഴുന്നതും രക്ഷാപ്രവർത്തനങ്ങൾക്ക് വെല്ലുവിളിയാകുന്നതായി ഉദ്യോഗസ്ഥർ അറിയിച്ചു. തീപിടിത്തത്തിൻ്റെ കാരണം ഇതുവരെ വ്യക്തമല്ല. തീപിടിത്തത്തെ തുടർന്ന് ഏകദേശം 700-ഓളം പേരെ താൽക്കാലിക താമസകേന്ദ്രങ്ങളിലേക്ക് മാറ്റിപ്പാർപ്പിച്ചു.