തിരുവനന്തപുരം: പാലത്തായി പീഡനക്കേസിൽ ജീവപര്യന്തം തടവിന് ശിക്ഷിക്കപ്പെട്ട അധ്യാപകനായ കെ. പദ്മരാജനെ ജോലിയിൽ നിന്ന് പിരിച്ചുവിട്ടതായി വിദ്യാഭ്യാസ മന്ത്രി വി. ശിവൻകുട്ടി അറിയിച്ചു. അധ്യാപകനെ പിരിച്ചുവിട്ടുകൊണ്ടുള്ള ഉത്തരവ് സ്കൂൾ മാനേജർ പുറപ്പെടുവിച്ചതായി മന്ത്രി ഫേസ്ബുക്ക് പോസ്റ്റിലൂടെ വ്യക്തമാക്കി. കണ്ണൂർ പാലത്തായിയിൽ നാലാം ക്ലാസ് വിദ്യാർഥിനിയെ പീഡിപ്പിച്ചെന്ന കേസിലാണ് ബിജെപി നേതാവും അധ്യാപകനുമായ പദ്മരാജനെ അതിവേഗ പ്രത്യേക കോടതി ജീവപര്യന്തം തടവിന് ശിക്ഷിച്ചത്.

പന്ത്രണ്ട് വയസ്സിൽ താഴെയുള്ള കുട്ടിയെ ബലാത്സംഗം ചെയ്തതിന് ഇന്ത്യൻ ശിക്ഷാനിയമം 376 എബി വകുപ്പ് പ്രകാരമാണ് ജീവിതാന്ത്യം വരെ നീളുന്ന ജീവപര്യന്തം തടവ് വിധിച്ചത്. ഈ വകുപ്പിൽ ഒരു ലക്ഷം രൂപ പിഴയടക്കണമെന്നും, ഇല്ലെങ്കിൽ ഒരു വർഷം കഠിനതടവ് അനുഭവിക്കണമെന്നും ജഡ്ജി എ.ടി. ജലജാറാണി വിധിന്യായത്തിൽ വ്യക്തമാക്കിയിരുന്നു. കൂടാതെ, പോക്സോ നിയമത്തിലെ അഞ്ച് (എഫ്), (എൽ) വകുപ്പുകൾ പ്രകാരം 20 വർഷം വീതം കഠിനതടവും ഒരു ലക്ഷം രൂപ പിഴയും വിധിച്ചിട്ടുണ്ട്. പിഴയടച്ചില്ലെങ്കിൽ ഈ വകുപ്പുകൾ പ്രകാരം ഒരു വർഷം കഠിനതടവ് അനുഭവിക്കണം. പോക്സോ വകുപ്പ് പ്രകാരമുള്ള ശിക്ഷ ഒന്നിച്ച് അനുഭവിച്ചാൽ മതിയാകും. ജീവിതാന്ത്യം വരെയുള്ള തടവ് അനുഭവിക്കുന്നതിന് മുൻപ് പോക്സോ വകുപ്പ് പ്രകാരമുള്ള ശിക്ഷകൾ അനുഭവിക്കണമെന്നും കോടതി വിധിച്ചിരുന്നു.