മലപ്പുറം: നന്നമ്പ്ര പഞ്ചായത്ത് ഓഫീസ് താഴിട്ട് പൂട്ടി യുവാവ് പ്രതിഷേധിച്ചു. തദ്ദേശ തെരഞ്ഞെടുപ്പുമായി ബന്ധപ്പെട്ട് നാമനിർദ്ദേശ പത്രിക നൽകാൻ സമയം വൈകിയതിനെ തുടർന്ന് കഴിഞ്ഞ ദിവസം തൻ്റെ പത്രിക സ്വീകരിക്കാത്തതിലുള്ള പ്രകോപനമാണ് ഈ നടപടിക്ക് പിന്നിലെന്ന് നാട്ടുകാർ പറയുന്നു. കൊടിഞ്ഞി സ്വദേശിയായ യുവാവാണ് ഓഫീസ് പൂട്ടി പ്രതിഷേധിച്ചത്.

ഇന്ന് രാവിലെ ജീവനക്കാർ പഞ്ചായത്ത് ഓഫീസിൽ എത്തിയപ്പോഴാണ് ഗേറ്റിൽ മറ്റൊരു താഴിട്ട് പൂട്ടിയ നിലയിൽ കണ്ടെത്തിയത്. തുടർന്ന് ഉദ്യോഗസ്ഥർ താഴ് പൊളിച്ച് അകത്ത് കടന്ന് ഓഫീസ് പ്രവർത്തനങ്ങൾ പുനരാരംഭിച്ചു. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്. പത്രിക സ്വീകരിക്കുന്നതുമായി ബന്ധപ്പെട്ട തർക്കമാണ് പഞ്ചായത്ത് ഓഫീസ് പൂട്ടുന്നതിലേക്ക് യുവാവിനെ പ്രേരിപ്പിച്ചതെന്നാണ് പ്രാഥമിക വിവരം.