തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പ് പ്രചാരണത്തിനിടെ സംസ്ഥാനത്ത് രണ്ടു മുന്നണികളിലെയും സ്ഥാനാർഥികളെ തെരുവുനായ്ക്കൾ കടിച്ചത് വാർത്തയായി. ഏറ്റവും ഒടുവിൽ പത്തനംതിട്ട ഓമല്ലൂരിൽ എൽ.ഡി.എഫ്. സ്ഥാനാർഥി ജലജക്കാണ് നായയുടെ കടിയേറ്റത്. പത്രിക സമർപ്പിച്ച ശേഷം വീട്ടിലേക്ക് മടങ്ങുകയായിരുന്ന നാലാം വാർഡ് എൽ.ഡി.എഫ്. സ്ഥാനാർഥിയായ ജലജയെ പറയനാലിക്ക് സമീപത്ത് വെച്ചാണ് നായ കടിച്ചത്. കാലിൽ കടിയേറ്റ ജലജ പത്തനംതിട്ട ജനറൽ ആശുപത്രിയിൽ ചികിത്സ തേടി.

കഴിഞ്ഞ ദിവസം ഇടുക്കി ജില്ലയിലും സമാനമായ സംഭവം നടന്നിരുന്നു. പ്രചാരണത്തിനിടെ യു.ഡി.എഫ്. സ്ഥാനാർഥിയെയാണ് നായ കടിച്ചത്. ഇടുക്കി ബൈസൺവാലി പഞ്ചായത്തിലെ രണ്ടാം വാർഡ് യു.ഡി.എഫ്. സ്ഥാനാർഥി ജാൻസി ബിജുവിനാണ് കടിയേറ്റത്. വോട്ട് തേടിയിറങ്ങിയ വീട്ടിലെ നായയാണ് ജാൻസിയെ ആക്രമിച്ചത്. രാവിലെ പ്രവർത്തകർക്കൊപ്പം പ്രചാരണത്തിനായി എത്തിയപ്പോഴാണ് സംഭവം. വോട്ട് തേടി ഒരു വീട്ടിൽ കയറിയപ്പോൾ കൂട്ടിലിട്ടിരുന്ന നായ കെട്ടഴിഞ്ഞ് കിടക്കുകയായിരുന്നു. ആളുകളെ കണ്ടയുടൻ നായ പാഞ്ഞടുത്തപ്പോൾ ഒപ്പമുണ്ടായിരുന്ന പ്രവർത്തകർ ഓടി രക്ഷപ്പെട്ടു. ജാൻസിയും ഓടിയെങ്കിലും നായ പിന്നാലെയെത്തി കടിക്കുകയായിരുന്നു. ഉടൻ തന്നെ ആശുപത്രിയിൽ ചികിത്സ തേടിയ ജാൻസി, വൈകുന്നേരത്തോടെ മണ്ഡലത്തിൽ വീണ്ടും പ്രചാരണം ആരംഭിക്കുമെന്ന് അറിയിച്ചു.