റിയാദ്: സൗദി അറേബ്യയിൽ ഉംറ തീർഥാടകർ സഞ്ചരിച്ച ബസ് ഡീസൽ ടാങ്കറുമായി കൂട്ടിയിടിച്ച് തീപിടിച്ച് 42 ഇന്ത്യൻ പൗരന്മാർക്ക് ദാരുണാന്ത്യം. മക്കയിലെ തീർഥാടനം പൂർത്തിയാക്കി മദീനയിലേക്ക് പോവുകയായിരുന്ന ഹൈദരാബാദ് സ്വദേശികൾ ഉൾപ്പെട്ട സംഘമാണ് അപകടത്തിൽപ്പെട്ടത്. മരിച്ചവരിൽ സ്ത്രീകളും കുട്ടികളും ഉൾപ്പെടുന്നു.

തിങ്കളാഴ്ച പുലർച്ചെ ഇന്ത്യൻ സമയം 1:30 ഓടെ (സൗദി സമയം രാത്രി 11 മണി) ബദ്റിനും മദീനയ്ക്കും ഇടയിലുള്ള മുഫറഹാത്ത് എന്ന സ്ഥലത്തുവെച്ചാണ് അപകടം നടന്നത്. ഉംറ തീർഥാടകർ സഞ്ചരിച്ച ബസ് ഡീസൽ ടാങ്കറുമായി കൂട്ടിയിടിച്ചതിനെ തുടർന്ന് ബസിന് തീപിടിക്കുകയായിരുന്നു. അപകടസമയത്ത് ബസിലുണ്ടായിരുന്ന 46 പേരിൽ ഒരാൾ മാത്രമാണ് രക്ഷപ്പെട്ടതെന്നാണ് പ്രാഥമിക റിപ്പോർട്ട്. രക്ഷപ്പെട്ടയാളെ ഗുരുതര പരിക്കുകളോടെ ആശുപത്രിയിൽ പ്രവേശിപ്പിച്ചു.

തീപിടിത്തത്തിൽ മൃതദേഹങ്ങൾ പൂർണ്ണമായി കത്തിക്കരിഞ്ഞ നിലയിലായതിനാൽ ഇവരെ തിരിച്ചറിയുന്നത് ദുഷ്കരമായി തുടരുകയാണ്. മൃതദേഹങ്ങൾ മോർച്ചറിയിലേക്ക് മാറ്റി. സംഭവത്തെ തുടർന്ന് ജിദ്ദയിലെ ഇന്ത്യൻ കോൺസുലേറ്റ് കൺട്രോൾ റൂം തുറക്കുകയും സൗദി അധികൃതരുമായി ചേർന്ന് സഹായങ്ങൾ ഏകോപിപ്പിക്കുകയും ചെയ്യുന്നുണ്ട്. അപകടത്തിൽ പ്രധാനമന്ത്രി നരേന്ദ്ര മോദി ഉൾപ്പെടെയുള്ളവർ ദുഃഖം രേഖപ്പെടുത്തി.