കൊച്ചി: തിരഞ്ഞെടുപ്പ് വോട്ടർ പട്ടികയിൽ നിന്നും നീക്കിയ നടപടി നീതികേടാണെന്നും വെറും രാഷ്ട്രീയം കളിക്കരുതെന്നും നിരീക്ഷിച്ച കേരള ഹൈക്കോടതി, വോട്ടർ വൈഷ്ണ വി. വിനോദിനെ പട്ടികയിൽ നിന്നും ഒഴിവാക്കിയ നടപടി റദ്ദാക്കി. രേഖകളിൽ വിലാസം കൃത്യമായിരുന്നുവെന്ന് കോടതി കണ്ടെത്തി. ഇടുക്കി ഉടുമ്പഞ്ചോലയിലെ വോട്ടർപട്ടികയിൽ നിന്നാണ് യൂത്ത് കോൺഗ്രസ് പ്രവർത്തക കൂടിയായ വൈഷ്ണ വി. വിനോദിനെ ഒഴിവാക്കിയത്.

ഹൈക്കോടതി ജസ്റ്റിസ് ദേവൻ രാമചന്ദ്രൻ്റെ സിംഗിൾ ബെഞ്ചാണ് നിർണ്ണായകമായ വിധി പുറപ്പെടുവിച്ചത്. 'സംസ്ഥാനത്തിൻ്റെ ഭരണചുമതല നിർവഹിക്കുന്നവരെക്കുറിച്ച് ചിന്തിക്കുമ്പോൾ നാമെല്ലാം ലജ്ജിക്കണം. വോട്ടർ പട്ടികയിൽ നിന്നും ഒഴിവാക്കപ്പെട്ടത് യൂത്ത് കോൺഗ്രസ് പ്രവർത്തകയായ വൈഷ്ണ ആയതുകൊണ്ട് ഇത് രാഷ്ട്രീയപരമായ കാരണങ്ങൾ കൊണ്ടാണോയെന്ന് സംശയിക്കേണ്ടിയിരിക്കുന്നു. ഇതെല്ലാം അങ്ങേയറ്റം വിഷമിപ്പിക്കുന്നു,' എന്നും കോടതി നിരീക്ഷിച്ചു.

വൈഷ്ണ വി. വിനോദ് ഉൾപ്പെടെയുള്ള 40 പേരെ വോട്ടർ പട്ടികയിൽ നിന്നും നീക്കിയതിനെതിരെയാണ് ഹർജി നൽകിയത്. എന്നാൽ, വൈഷ്ണയുടെ കാര്യത്തിൽ വിലാസം കൃത്യമായിരുന്നുവെന്ന് കോടതി കണ്ടെത്തിയതോടെയാണ്, വെറും രാഷ്ട്രീയം കളിക്കരുതെന്നും ഇത്തരം നീതികേടുകൾ അംഗീകരിക്കാനാവില്ലെന്നും കോടതി രൂക്ഷമായി വിമർശിച്ചത്.