കോഴിക്കോട്: ഊണിനൊപ്പം അയക്കൂറ മീൻ കറി കിട്ടാത്തതിനെ തുടർന്ന് ബാലുശ്ശേരി നന്മണ്ടയിലെ 'ഫോർട്ടീൻസ്' ഹോട്ടലിൽ ആക്രമണം. ശനിയാഴ്ച ഉച്ചയോടെയാണ് സംഭവം. ഒരു പിറന്നാളാഘോഷത്തിൻ്റെ ഭാഗമായി ഹോട്ടലിൽ 40 പേർക്ക് ഭക്ഷണം ഏർപ്പാടാക്കിയിരുന്നു. രണ്ടാമതെത്തിയ സംഘത്തിലെ ചിലർ ഊണിനൊപ്പം അയക്കൂറ മീൻ ആവശ്യപ്പെട്ടു.

അയക്കൂറ ഇല്ലെന്നും അയല മതിയോ എന്നും ജീവനക്കാർ ചോദിച്ചതോടെ സംഘം പ്രകോപിതരായി ബഹളമുണ്ടാക്കുകയും ഹോട്ടലിലെ മേശകളും കസേരകളും അടിച്ചു തകർക്കുകയുമായിരുന്നു. ആക്രമണത്തിൽ അഞ്ച് ഹോട്ടൽ ജീവനക്കാർക്ക് പരിക്കേറ്റു. ഇവരെ പിന്നീട് ആശുപത്രിയിൽ പ്രവേശിപ്പിച്ചു. സംഭവത്തിൽ ബാലുശ്ശേരി പോലീസ് കേസെടുത്ത് അന്വേഷണം ആരംഭിച്ചു.