കുവൈറ്റ് സിറ്റി: കുവൈറ്റിലെ അബ്ദല്ലിയിലുള്ള എണ്ണ ഖനന കേന്ദ്രത്തിലുണ്ടായ ദാരുണമായ അപകടത്തിൽ രണ്ട് മലയാളി തൊഴിലാളികൾ മരണപ്പെട്ടു. തൃശ്ശൂർ സ്വദേശി നടുവിലെ പറമ്പിൽ നിഷിൽ സദാനന്ദൻ (40), കൊല്ലം സ്വദേശി സുനിൽ സോളമൻ (43) എന്നിവരാണ് മരിച്ചത്. ഇരുവരും ജോലി ചെയ്യുന്നതിനിടെയാണ് അപകടം സംഭവിച്ചത്. അപകടത്തിൽ തലയ്ക്ക് ഗുരുതരമായി പരിക്കേറ്റതാണ് മരണത്തിലേക്ക് നയിച്ചതെന്നാണ് പ്രാഥമിക റിപ്പോർട്ട്.

അപകടത്തിന്റെ വിശദമായ വിവരങ്ങൾ ഇനിയും ലഭ്യമായിട്ടില്ല. സംഭവം സംബന്ധിച്ച് ഔദ്യോഗിക സ്ഥിരീകരണം വന്നിട്ടില്ലെങ്കിലും, കുവൈറ്റിലെ ഇന്ത്യൻ എംബസി അധികൃതരും ഇവർ ജോലി ചെയ്തിരുന്ന കമ്പനിയുടെ പ്രതിനിധികളും വിഷയത്തിൽ ഇടപെട്ടിട്ടുണ്ട്. നിലവിൽ ജഹ്റ ആശുപത്രി മോർച്ചറിയിൽ സൂക്ഷിച്ചിരിക്കുന്ന മൃതദേഹങ്ങൾ പോസ്റ്റ്‌മോർട്ടം നടപടികൾക്കായി വൈകാതെ ദജീജ് ഫോറൻസിക് വിഭാഗത്തിലേക്ക് മാറ്റും.