പത്തനംതിട്ട: ശബരിമലയിലെ സ്വർണക്കൊള്ളക്കേസിലെ മുഖ്യപ്രതികളായ ഉണ്ണികൃഷ്ണൻ പോറ്റിയേയും മുൻ ദേവസ്വം അഡ്മിനിസ്ട്രേറ്റീവ് ഓഫീസർ മുരാരി ബാബുവിനെയും റാന്നി ജുഡീഷ്യൽ ഒന്നാം ക്ലാസ് മജിസ്‌ട്രേറ്റ് കോടതി റിമാൻഡ് ചെയ്തു. ഇരുവരേയും തിരുവനന്തപുരം സ്പെഷ്യൽ സബ് ജയിലിലേക്ക് മാറ്റി.
സ്വർണം പൂശുന്നതിന് കരാറെടുത്ത ഉണ്ണികൃഷ്ണൻ പോറ്റിയാണ് കേസിലെ ഒന്നാം പ്രതി. ദീർഘനാളത്തെ ചോദ്യം ചെയ്യലിനും തെളിവെടുപ്പിനും ശേഷമാണ് പോറ്റിയെ കോടതിയിൽ ഹാജരാക്കിയത്. ഉണ്ണിക്കൃഷ്ണൻ പോറ്റി ഒന്നാം പ്രതിയായ ദ്വാരപാലക ശിൽപ്പത്തിലെ സ്വർണ മോഷണക്കേസുകളിലും കട്ടിളപ്പാളിയിലെ സ്വർണമോഷണ കേസുകളിലും മുരാരി ബാബു രണ്ടാം പ്രതിയാണ്. ദേവസ്വം ഉദ്യോഗസ്ഥൻ എന്ന നിലയിൽ ക്രമക്കേടുകൾക്ക് ഒത്താശ ചെയ്തതിനാണ് മുരാരി ബാബുവിനെ അറസ്റ്റ് ചെയ്തത്.
സ്വർണം മോഷണം പോയ സംഭവത്തിൽ ഉന്നത ദേവസ്വം ബോർഡ് ഉദ്യോഗസ്ഥരുടെയും മുൻ ഭരണാധികാരികളുടെയും പങ്കിനെക്കുറിച്ച് മുരാരി ബാബു മൊഴി നൽകിയതായാണ് സൂചന. ഇതിന്റെ അടിസ്ഥാനത്തിൽ മുൻ ദേവസ്വം ബോർഡ് പ്രസിഡന്റുമാരടക്കമുള്ള ഉന്നതരെ പ്രത്യേക അന്വേഷണ സംഘം (എസ്.ഐ.ടി.) ഉടൻ ചോദ്യം ചെയ്യും. സ്വർണക്കൊള്ളയ്ക്ക് പിന്നിൽ അന്താരാഷ്ട്ര ബന്ധമുണ്ടോയെന്ന് ഹൈക്കോടതി നേരത്തെ സംശയം പ്രകടിപ്പിച്ചിരുന്നു.