ടോക്കിയോ: ജപ്പാനിലെ വടക്കൻ പസഫിക് തീരത്തോട് ചേർന്ന് ശക്തമായ ഭൂചലനം അനുഭവപ്പെട്ടതിനെ തുടർന്ന് രാജ്യത്ത് സൂനാമി മുന്നറിയിപ്പ് നൽകി. റിക്ടർ സ്കെയിലിൽ 6.7 തീവ്രത രേഖപ്പെടുത്തിയ ഭൂചലനമാണ് ഉണ്ടായത്. പ്രാദേശിക സമയം ഞായറാഴ്ച വൈകിട്ട് 5.03-ഓടെയാണ് ഇവാട്ടെ പ്രിഫെക്ചർ തീരത്തുനിന്ന് അകലെ സമുദ്രഭാഗത്ത് ഭൂചലനം അനുഭവപ്പെട്ടത്. ജപ്പാൻ കാലാവസ്ഥാ ഏജൻസിയായ ജെ.എം.എ.യുടെ മുന്നറിയിപ്പ് അനുസരിച്ച്, ഇവാട്ടെ തീരത്ത് ഒരു മീറ്റർ (ഏകദേശം മൂന്ന് അടി) വരെ ഉയരത്തിലുള്ള തിരമാലകൾ എത്താൻ സാധ്യതയുണ്ട്. മുന്നറിയിപ്പിന് പിന്നാലെ ചെറിയ തിരമാലകൾ തീരത്ത് രേഖപ്പെടുത്തിയതായി ഏജൻസി സ്ഥിരീകരിച്ചു.

സമുദ്രത്തിൽ ഏകദേശം 10 കിലോമീറ്റർ ആഴത്തിലാണ് ഭൂചലനത്തിന്റെ പ്രഭവകേന്ദ്രം. ഭൂചലനം ഇവാട്ടെ, മിയാഗി പ്രിഫെക്ചറുകളിലെ ചില ഭാഗങ്ങളിൽ 'ഷിൻഡോ 4' (ഇടത്തരം തീവ്രത) രേഖപ്പെടുത്തി. നാശനഷ്ടങ്ങളോ ആളപായമോ റിപ്പോർട്ട് ചെയ്തിട്ടില്ലെങ്കിലും, തീരദേശങ്ങളിൽ നിന്ന് സുരക്ഷിത സ്ഥാനങ്ങളിലേക്ക് മാറിയിരിക്കാൻ അധികൃതർ ജനങ്ങളോട് കർശനമായി ആവശ്യപ്പെട്ടിട്ടുണ്ട്. ഭൂചലനത്തെ തുടർന്ന് ടോഹോകു ഷിൻകാൻസെൻ (ബുള്ളറ്റ് ട്രെയിൻ) സർവീസുകൾ താൽക്കാലികമായി നിർത്തിവച്ചെങ്കിലും പിന്നീട് പുനരാരംഭിച്ചു. തുടർചലനങ്ങൾക്ക് സാധ്യതയുള്ളതിനാൽ ജനങ്ങൾ ജാഗ്രത പാലിക്കണമെന്നും അധികൃതർ മുന്നറിയിപ്പ് നൽകി.