പാലക്കാട് അട്ടപ്പാടിയിലെ കരുവാരഊരിലാണ് പാതി പണിത വീട് ഇടിഞ്ഞുവീണ് സഹോദരങ്ങൾക്ക് ദാരുണാന്ത്യമുണ്ടായത്. ഏഴ് വയസ്സുകാരൻ ആദിയും നാല് വയസ്സുകാരനായ അജ്‌നേഷുമാണ് മരിച്ചത്. ഒപ്പമുണ്ടായിരുന്ന ബന്ധുവായ ആറ് വയസ്സുകാരി അഭിനയക്ക് ഗുരുതരമായി പരുക്കേറ്റു. ഇന്ന് വൈകിട്ടാണ് അട്ടപ്പാടിയെ നടുക്കിയ ഈ അപകടം സംഭവിച്ചത്.

2016-ൽ പണി നിർത്തിവെച്ചതും ആളുകൾ താമസിക്കാത്തതുമായ ഈ വീട്ടിൽ കുട്ടികൾ കളിക്കാൻ എത്തിയപ്പോഴാണ് ഭിത്തി ഇടിഞ്ഞുവീണത്. മുക്കാലിയിൽ നിന്ന് നാല് മീറ്റർ വനത്തിനുള്ളിലാണ് ഊര് സ്ഥിതിചെയ്യുന്നത്. അപകടം നടന്നയുടൻ കുട്ടികളെ ആശുപത്രിയിലെത്തിക്കാൻ പലരെയും ഫോണിൽ ബന്ധപ്പെടാൻ ശ്രമിച്ചെങ്കിലും ലഭ്യമായില്ല. തുടർന്ന് അടുത്തുള്ള വീട്ടിലെ ബൈക്കിലും പിന്നീട് വനംവകുപ്പിന്റെ ജീപ്പിലുമാണ് കുട്ടികളെ ആശുപത്രിയിൽ എത്തിച്ചത്. മൃതദേഹങ്ങൾ കോട്ടത്തറ ട്രൈബൽ ആശുപത്രി മോർച്ചറിയിലാണ് സൂക്ഷിച്ചിരിക്കുന്നത്. പോസ്റ്റ്‌മോർട്ടത്തിനു ശേഷം ബന്ധുക്കൾക്ക് വിട്ടുനൽകും.