കോട്ടയം: ശബരിമലയിലെ സ്വർണപ്പാളികൾ കാണാതായതുമായി ബന്ധപ്പെട്ട കേസിൽ മുഖ്യപ്രതിയായ ഉണ്ണികൃഷ്ണൻ പോറ്റിയുടെ വിദേശ യാത്രകളിൽ പ്രത്യേക അന്വേഷണ സംഘം (എസ്‌ഐടി) അന്വേഷണം പ്രഖ്യാപിച്ചു. 2019-നും 2025-നും ഇടയിൽ പോറ്റി നടത്തിയ വിദേശ യാത്രകളാണ് എസ്‌ഐടിയുടെ വിശദമായ പരിശോധനയിലുള്ളത്.
സ്വർണക്കൊള്ളയ്ക്ക് അന്താരാഷ്ട്ര ബന്ധമുണ്ടോയെന്ന് ഹൈക്കോടതി കഴിഞ്ഞ ദിവസം സംശയം പ്രകടിപ്പിച്ച സാഹചര്യത്തിലാണ് പോറ്റിയുടെ വിദേശയാത്രകൾ അന്വേഷണ പരിധിയിലാക്കിയത്. ക്ഷേത്രങ്ങളിൽ നിന്നും പുരാവസ്തുക്കളും വിഗ്രഹങ്ങളും കൊള്ളയടിച്ച് കടത്തുന്ന അന്താരാഷ്ട്ര കുറ്റവാളിയായ സുഭാഷ് കപൂറിന്റെ രീതിക്ക് സമാനമായ കൊള്ളയാണ് ഉണ്ണികൃഷ്ണൻ പോറ്റി ശബരിമലയിൽ നടത്തിയതെന്നായിരുന്നു കോടതിയുടെ നിരീക്ഷണം. ഈ പശ്ചാത്തലത്തിൽ പോറ്റി നടത്തിയ നിരവധി വിദേശയാത്രകളെക്കുറിച്ച് എസ്‌ഐടി വിശദമായി ചോദ്യം ചെയ്യുകയാണ്.
നിലവിൽ കേസിൽ അറസ്റ്റിലായ മുൻ തിരുവാഭരണ കമ്മീഷണർ കെ.എസ്. ബൈജുവിന്റെ മൊഴിയുടെ അടിസ്ഥാനത്തിൽ കസ്റ്റഡിയിൽ കഴിയുന്ന മുരാരി ബാബുവിനെയും സുധീഷ് കുമാറിനെയും എസ്.പിമാരായ ശശിധരൻ, ബിജോയ് എന്നിവരുടെ നേതൃത്വത്തിലുള്ള എസ്‌ഐടി ഇന്ന് വിശദമായി ചോദ്യം ചെയ്യും. കട്ടിളപ്പാളികൾ കൊടുത്തയച്ചപ്പോഴും തിരികെ കൊണ്ടുവന്നപ്പോഴും പരിശോധനയോ ദേവസ്വം സ്മിത്തിൻ്റെ സാന്നിധ്യമോ ഉറപ്പാക്കാൻ തിരുവാഭരണ കമ്മീഷണർ ശ്രമിച്ചിരുന്നില്ല. ഇത് ഉന്നത ഉദ്യോഗസ്ഥരുടെ താൽപര്യപ്രകാരമായിരുന്നുവെന്ന് ബൈജു മൊഴി നൽകിയിട്ടുണ്ട്.