കൊച്ചി: എറണാകുളം – കെഎസ്ആർ ബെംഗളൂരു വന്ദേഭാരത് എക്സ്പ്രസിന്റെ ഉദ്ഘാടന യാത്രയിൽ വിദ്യാർഥികളെക്കൊണ്ട് ആർഎസ്എസ് ഗണഗീതം ആലപിച്ച സംഭവം വിവാദമായി. കേരളത്തിനായി അനുവദിച്ച മൂന്നാമത്തെ വന്ദേഭാരത് ട്രെയിനിന്റെ ഉദ്ഘാടന ചടങ്ങിനിടെയാണ് ഗണഗീതം ആലപിച്ചത്.ഗണഗീതം ആലപിക്കുന്ന വിദ്യാർഥികളുടെ വീഡിയോ ദക്ഷിണ റെയിൽവേ തങ്ങളുടെ ഔദ്യോഗിക സമൂഹമാധ്യമ പേജുകളിൽ 'ദേശഭക്തി ഗാനം' എന്ന കുറിപ്പോടെ പങ്കുവെച്ചിരുന്നു. എന്നാൽ, സംഭവം വലിയ വിമർശനങ്ങൾക്ക് വഴിവെച്ചതോടെ മണിക്കൂറുകൾക്കകം റെയിൽവേ ഈ പോസ്റ്റ് നീക്കം ചെയ്തു.
രാജ്യത്തെ പൊതുമേഖലാ സ്ഥാപനമായ റെയിൽവേയെ വർഗീയ രാഷ്ട്രീയ പ്രചാരണത്തിനായി ഉപയോഗിക്കുകയാണെന്ന് ആരോപിച്ച് മുഖ്യമന്ത്രി പിണറായി വിജയനടക്കം നിരവധി രാഷ്ട്രീയ നേതാക്കളും സംഘടനകളും രംഗത്തെത്തി. അപരമത വിദ്വേഷവും വർഗ്ഗീയ വിഭജന രാഷ്ട്രീയവും പ്രസരിപ്പിക്കുന്ന ഒരു സംഘടനയുടെ ഗാനം ഔദ്യോഗിക പരിപാടിയിൽ ഉൾപ്പെടുത്തിയത് ഭരണഘടനാ തത്വങ്ങളുടെ ലംഘനമാണെന്ന് മുഖ്യമന്ത്രി പ്രസ്താവനയിൽ പറഞ്ഞു.ഇന്ത്യൻ റെയിൽവേ ചരിത്രത്തിൽ ഇത്രയും തരം താഴ്ന്ന രീതിയിൽ പ്രവർത്തിച്ചിട്ടില്ലെന്ന് സി.പി.എം. എം.പി. ജോൺ ബ്രിട്ടാസ് വിമർശിച്ചു. പൊതു സ്ഥാപനങ്ങളെ ആർഎസ്എസ് വത്കരിക്കുന്ന കേന്ദ്രസർക്കാർ നടപടിയുടെ തുടർച്ചയാണിതെന്നും അദ്ദേഹം കൂട്ടിച്ചേർത്തു. അതേസമയം, സംഭവത്തിൽ റെയിൽവേ അധികൃതർ ഇതുവരെ ഔദ്യോഗിക വിശദീകരണം നൽകിയിട്ടില്ല. പ്രധാനമന്ത്രി നരേന്ദ്ര മോദി ഓൺലൈനായാണ് പുതിയ വന്ദേഭാരത് സർവീസ് ഫ്ലാഗ് ഓഫ് ചെയ്തത്.