തിരുവനന്തപുരം: തിരുവിതാംകൂർ ദേവസ്വം ബോർഡിന്റെ പുതിയ പ്രസിഡന്റായി മുൻ ചീഫ് സെക്രട്ടറിയും മുതിർന്ന ഐഎഎസ് ഉദ്യോഗസ്ഥനുമായ കെ. ജയകുമാർ എത്തുമെന്ന് ഉറപ്പായി. ഇതു സംബന്ധിച്ചുള്ള ഔദ്യോഗിക സർക്കാർ ഉത്തരവ് ഉടൻ പുറത്തിറങ്ങും. ഇന്ന് ചേർന്ന സി.പി.എം സംസ്ഥാന സെക്രട്ടേറിയറ്റിലാണ് കെ. ജയകുമാറിനെ പ്രസിഡന്റായി നിയമിക്കാൻ ധാരണയായത്. നിലവിൽ ഇൻസ്റ്റിറ്റ്യൂട്ട് ഓഫ് മാനേജ്‌മെന്റ് ഇൻ ഗവൺമെന്റ് (ഐ.എം.ജി) ഡയറക്ടറാണ് അദ്ദേഹം.
ശബരിമലയിലെ സ്വർണക്കൊള്ള ഉൾപ്പെടെയുള്ള വിവാദങ്ങളിൽ നിലവിലെ ബോർഡ് സംശയത്തിന്റെ നിഴലിൽ നിൽക്കുന്ന സാഹചര്യത്തിലാണ്, ഭരണരംഗത്തും പൊതുരംഗത്തും ക്ലീൻ ഇമേജുള്ള കെ. ജയകുമാറിനെ പ്രസിഡന്റ് സ്ഥാനത്തേക്ക് കൊണ്ടുവരാൻ സി.പി.എം തീരുമാനിച്ചത്. മുഖ്യമന്ത്രിയടക്കമുള്ളവരുടെ നിർദ്ദേശപ്രകാരമാണ് അദ്ദേഹത്തിന്റെ പേര് പരിഗണിച്ചത്. നിലവിലെ ബോർഡ് പ്രസിഡന്റ് പി.എസ്. പ്രശാന്ത് ഉൾപ്പെടെയുള്ളവരുടെ കാലാവധി ഈ മാസം 12-ന് അവസാനിക്കാനിരിക്കുകയാണ്.
മുൻപ് ശബരിമല സ്‌പെഷ്യൽ കമ്മീഷണർ, ശബരിമല ഹൈ പവർ കമ്മിറ്റി ചെയർമാൻ എന്നീ നിലകളിലും കെ. ജയകുമാർ പ്രവർത്തിച്ചിട്ടുണ്ട്. ചീഫ് സെക്രട്ടറി സ്ഥാനത്തിനു പുറമെ ടൂറിസം സെക്രട്ടറി, തുഞ്ചത്തെഴുത്തച്ഛൻ മലയാള സർവകലാശാല വൈസ് ചാൻസലർ, ചലച്ചിത്ര ഗാനരചയിതാവ് തുടങ്ങിയ നിലകളിലും അദ്ദേഹം ശ്രദ്ധേയനാണ്. പുതിയ ദേവസ്വം ബോർഡ് അംഗമായി സി.പി.ഐ പ്രതിനിധിയായി വിളപ്പിൽ രാധാകൃഷ്ണനെ തീരുമാനിച്ചിട്ടുണ്ട്. മണ്ഡല-മകരവിളക്ക് തീർത്ഥാടനത്തിന് മുന്നോടിയായി ദേവസ്വം ബോർഡ് പുനഃസംഘടിപ്പിക്കുന്നത് ഭരണപരമായ കാര്യക്ഷമത ഉറപ്പാക്കാൻ സഹായിക്കുമെന്നാണ് വിലയിരുത്തൽ.