കോഴിക്കോട്: കുന്ദമംഗലത്ത് വിദ്യാർഥിനിയെ ബലാത്സംഗം ചെയ്തെന്ന പരാതിയിൽ പാലക്കാട് സ്വദേശിയും ചാത്തമംഗലം എൻഐടിയിൽ (ദേശീയ സാങ്കേതിക വിദ്യാ സ്ഥാപനം) ടീച്ചിങ് അസിസ്റ്റന്റുമായ വിഷ്ണുവിനെ (32) കുന്ദമംഗലം പോലീസ് പിടികൂടി. ഇന്റേണൽ മാർക്ക് കുറയ്ക്കുമെന്ന് ഭീഷണിപ്പെടുത്തി ഈ വർഷം ഏപ്രിൽ മാസം മുതൽ പല ദിവസങ്ങളിലായി ഇയാൾ വിദ്യാർഥിനിയെ ലൈംഗികമായി പീഡിപ്പിക്കുകയായിരുന്നു.

കെട്ടാങ്ങലിലെ ഒരു ഹൗസിങ് കോംപ്ലക്‌സിലും പൊറ്റമ്മലിൽ വെച്ചും ബലാത്സംഗം ചെയ്തതായാണ് പരാതിയിൽ പറയുന്നത്. കൂടാതെ, വിദ്യാർഥിനിയുടെ നഗ്ന ഫോട്ടോകൾ പകർത്തി അത് സമൂഹമാധ്യമങ്ങൾ വഴി പ്രചരിപ്പിക്കുമെന്ന് ഇയാൾ ഭീഷണിപ്പെടുത്തിയതായും പരാതിയിലുണ്ട്. വിദ്യാർഥിനിയുടെ പരാതിയിൽ കുന്ദമംഗലം പോലീസ് കേസ് രജിസ്റ്റർ ചെയ്യുകയും, തുടർന്ന് പ്രതിയെ കളൻതോട് വെച്ച് കസ്റ്റഡിയിൽ എടുക്കുകയുമായിരുന്നു.