ഛത്തീസ്ഗഢിലെ ബിലാസ്പൂരിൽ യാത്രാ ട്രെയിനും ചരക്ക് ട്രെയിനും കൂട്ടിയിടിച്ച് അപകടം. ബിലാസ്പൂരിന് സമീപം ലാൽഖദാൻഃ ജയ്‌റാംനഗർ സ്റ്റേഷനുകൾക്കിടയിലാണ് അപകടം നടന്നത്. കോർബ പാസഞ്ചർ ട്രെയിനാണ് ഗുഡ്‌സ് ട്രെയിനുമായി കൂട്ടിയിടിച്ചത്. അപകടത്തിൽ കുറഞ്ഞത് ആറ് പേർ മരിച്ചതായും നിരവധി പേർക്ക് പരിക്കേറ്റതായും പ്രാഥമിക റിപ്പോർട്ടുകൾ സൂചിപ്പിക്കുന്നു.കൂട്ടിയിടിയുടെ ആഘാതത്തിൽ പാസഞ്ചർ ട്രെയിനിന്റെ നിരവധി കോച്ചുകൾ പാളം തെറ്റി. പരിക്കേറ്റവരെ ഉടൻ തന്നെ സമീപത്തെ ആശുപത്രികളിലേക്ക് മാറ്റി.
മരണസംഖ്യ ഇനിയും വർധിക്കാൻ സാധ്യതയുണ്ടെന്നാണ് വിവരം.വിവരം ലഭിച്ച ഉടൻ റെയിൽവേ അധികൃതരും ദുരിതാശ്വാസ സംഘങ്ങളും സ്ഥലത്തെത്തി രക്ഷാപ്രവർത്തനം ആരംഭിച്ചു. അപകടത്തെ തുടർന്ന് ബിലാസ്പൂർ-കാട്‌നി റൂട്ടിലെ ട്രെയിൻ ഗതാഗതം പൂർണ്ണമായി തടസ്സപ്പെട്ടു. നിരവധി ട്രെയിനുകൾ റദ്ദാക്കുകയും വഴിതിരിച്ചുവിടുകയും ചെയ്തിട്ടുണ്ട്. അപകടത്തിന്റെ കാരണം കണ്ടെത്താൻ റെയിൽവേ അന്വേഷണം ആരംഭിച്ചിട്ടുണ്ട്. സിഗ്നൽ തകരാറോ മനുഷ്യസഹജമായ പിഴവോ ആകാം അപകടത്തിലേക്ക് നയിച്ചതെന്നാണ് പ്രാഥമിക നിഗമനം.