തിരുവനന്തപുരം: വർക്കലയിൽ ഓടിക്കൊണ്ടിരുന്ന കേരള എക്സ്പ്രസ് ട്രെയിനിൽ നിന്ന് സഹയാത്രികൻ തള്ളിയിട്ടതിനെത്തുടർന്ന് ഗുരുതരമായി പരിക്കേറ്റ 19 വയസ്സുകാരി പാലോട് സ്വദേശിനി ശ്രീക്കുട്ടി എന്ന സോനയുടെ ആരോഗ്യനില അതീവ ഗുരുതരമായി തുടരുന്നു. തിരുവനന്തപുരം മെഡിക്കൽ കോളേജ് ആശുപത്രിയിലെ തീവ്രപരിചരണ വിഭാഗത്തിലാണ് യുവതി ചികിത്സയിൽ കഴിയുന്നത്. തലയ്ക്കും നട്ടെല്ലിനും ഗുരുതരമായ പരിക്കേറ്റ യുവതിക്ക് ആന്തരിക രക്തസ്രാവമുണ്ട്. വെന്റിലേറ്ററിന്റെ സഹായത്തോടെയാണ് ശ്രീക്കുട്ടിയുടെ ജീവൻ നിലനിർത്തുന്നത്. ഞായറാഴ്ച രാത്രി 8.30-ഓടെയാണ് കേസിനാസ്പദമായ സംഭവം നടന്നത്.

ആലുവയിൽ നിന്ന് തിരുവനന്തപുരത്തേക്ക് യാത്ര ചെയ്യുകയായിരുന്ന ശ്രീക്കുട്ടിയെ മദ്യപനായിരുന്ന പനച്ചിമൂട് സ്വദേശി സുരേഷ് കുമാർ (48) പ്രകോപനമില്ലാതെ ചവിട്ടി പുറത്തേക്ക് തള്ളിയിടുകയായിരുന്നുവെന്ന് കൂടെയുണ്ടായിരുന്ന സുഹൃത്ത് മൊഴി നൽകിയിട്ടുണ്ട്. പ്രതിയെ മറ്റു യാത്രക്കാർ പിടികൂടി റെയിൽവേ പോലീസിന് കൈമാറുകയായിരുന്നു. സുരേഷ് കുമാറിനെതിരെ വധശ്രമം ഉൾപ്പെടെയുള്ള വകുപ്പുകൾ ചുമത്തി റെയിൽവേ പോലീസ് കേസെടുത്തിട്ടുണ്ട്. അതേസമയം, മെഡിക്കൽ കോളേജിൽ ലഭിക്കുന്ന ചികിത്സയിൽ തൃപ്തരല്ലെന്ന് കാണിച്ച് ശ്രീക്കുട്ടിയുടെ കുടുംബം രംഗത്തെത്തിയിട്ടുണ്ട്. മകൾക്ക് അടിയന്തരമായി വിദഗ്ധ ചികിത്സ ഉറപ്പാക്കാൻ സർക്കാർ ഇടപെടണമെന്നും കുടുംബം ആവശ്യപ്പെട്ടു.