തിരുവനന്തപുരം: മലയാളത്തിൻ്റെ മഹാനടൻ മമ്മൂട്ടിയെ തേടി വീണ്ടും സംസ്ഥാന ചലച്ചിത്ര പുരസ്‌കാരം. 55-ാമത് സംസ്ഥാന ചലച്ചിത്ര അവാർഡുകളിൽ (Kerala State Film Awards 2024) മികച്ച നടനായി മമ്മൂട്ടിയെ തിരഞ്ഞെടുത്തു. രാഹുൽ സദാശിവൻ സംവിധാനം ചെയ്ത 'ഭ്രമയുഗം' എന്ന ചിത്രത്തിലെ കൊടുമൺ പോറ്റി എന്ന കഥാപാത്രത്തിനാണ് അദ്ദേഹം പുരസ്‌കാരം നേടിയത്.
ഭയം, നിഗൂഢത, ദുർമന്ത്രവാദം എന്നിവ നിറഞ്ഞ ബ്ലാക്ക് ആൻഡ് വൈറ്റ് ചിത്രമായ 'ഭ്രമയുഗ'ത്തിലെ, കൊടുമൺ പോറ്റിയുടെ അതിഗംഭീരമായ പ്രകടനം സിനിമാ നിരൂപകരുടെയും പ്രേക്ഷകരുടെയും വലിയ പ്രശംസ പിടിച്ചുപറ്റിയിരുന്നു. മമ്മൂട്ടിയുടെ കരിയറിലെ തന്നെ ഏറ്റവും മികച്ചതും വെല്ലുവിളി നിറഞ്ഞതുമായ കഥാപാത്രങ്ങളിൽ ഒന്നായിട്ടാണ് പോറ്റിയെ വിലയിരുത്തുന്നത്. മറ്റ് യുവതാരങ്ങൾ കടുത്ത മത്സരം കാഴ്ചവെച്ചെങ്കിലും, 'ഭ്രമയുഗ'ത്തിലൂടെയുള്ള മമ്മൂട്ടിയുടെ പരകായ പ്രവേശം അദ്ദേഹത്തിന് ഏഴാം തവണയും സംസ്ഥാന പുരസ്‌കാരം നേടിക്കൊടുത്തു.
മലയാള സിനിമയിൽ ഏറ്റവും കൂടുതൽ തവണ മികച്ച നടനുള്ള സംസ്ഥാന അവാർഡ് നേടുന്ന നടൻ എന്ന റെക്കോർഡും ഇതോടെ മമ്മൂട്ടിയുടെ പേരിലായി. അതേസമയം ഫെമിനിച്ചി ഫാത്തിമയിലെ പ്രകടനത്തിന് ഷംല ഹംസയാണ് മികച്ച നടിയായത്. ചിദംബരം സംവിധാനം ചെയ്ത 'മഞ്ഞുമ്മൽ ബോയ്സ്' മികച്ച ചിത്രമായി തിരഞ്ഞെടുക്കപ്പെട്ടു.