കൊച്ചി: ശബരിമല സ്വർണ്ണപ്പാളി തട്ടിപ്പുമായി ബന്ധപ്പെട്ട് മുഖ്യപ്രതിയായ ഉണ്ണികൃഷ്ണൻ പോറ്റി സ്വർണം വിറ്റത് 15 ലക്ഷം രൂപയ്ക്കാണെന്ന് റിപ്പോർട്ട്. ജ്വല്ലറി വ്യാപാരിയായ ഗോവർദ്ധൻ ആണ് സ്വർണം വാങ്ങിയതെന്ന് സ്പെഷ്യൽ ഇൻവെസ്റ്റിഗേഷൻ ടീം (SIT) മുമ്പാകെ മൊഴി നൽകി. ശബരിമലയിലെ സ്വർണ്ണപ്പാളി ചെന്നൈയിലെ സ്മാർട്ട് ക്രിയേഷൻ കൊണ്ടുപോയി ഉരുക്കിയ ശേഷം ബാക്കി വന്ന 476 ഗ്രാം സ്വർണ്ണമാണ് 2019-ൽ ഉണ്ണികൃഷ്ണൻ പോറ്റി ഗോവർദ്ധന് കൈമാറിയത്. ഈ സ്വർണത്തിന് 15 ലക്ഷത്തോളം രൂപ കൈപ്പറ്റിയെന്നും മൊഴിയുണ്ട്.

കൂടാതെ, ശബരിമലയിലെ പൂജകളുടെയും അന്നദാനത്തിന്റെയും പേരുകളിൽ ഉണ്ണികൃഷ്ണൻ പോറ്റി പലതവണയായി ഗോവർദ്ധനിൽ നിന്ന് 70 ലക്ഷം രൂപയോളം കൈക്കലാക്കിയിട്ടുണ്ട്. സ്വർണം പൂശുന്നതിന്റെ പേരിൽ പലതവണയായി 60 പവനോളം സ്വർണ്ണവും കൈപ്പറ്റി. ഉണ്ണികൃഷ്ണൻ പോറ്റി ഗോവർധന് കൈമാറിയ ഈ സ്വർണമാണ് നേരത്തെ അന്വേഷണസംഘം ബെല്ലാരിയിൽ നിന്നും കണ്ടെത്തിയത്.