പത്തനംതിട്ട: ശബരിമല മണ്ഡല മകരവിളക്ക് തീർത്ഥാടനത്തോടനുബന്ധിച്ചുള്ള വെർച്വൽ ക്യൂ ബുക്കിംഗ് നാളെ (ശനി) ആരംഭിക്കും. ഔദ്യോഗിക വെബ്സൈറ്റ് വഴിയാണ് ബുക്കിങ് നടത്തേണ്ടത്. പ്രതിദിനം 70,000 പേർക്ക് വരെ വെർച്വൽ ക്യൂ ബുക്കിംഗ് ചെയ്യാം, കൂടാതെ 20,000 പേർക്ക് സ്‌പോട്ട് ബുക്കിംഗ് വഴിയും ദർശനം നടത്താം. ഒരു ദിവസം ആകെ 90,000 പേർക്കാണ് ദർശനത്തിന് അനുമതി. www.sabarimalaonline.org എന്ന വെബ്സൈറ്റിലൂടെയാണ് തീർത്ഥാടകർ വെർച്വൽ ക്യൂ ബുക്കിംഗ് ചെയ്യേണ്ടത്.

ഒരേസമയം പതിനായിരം പേർക്ക് വിശ്രമിക്കാൻ സാധിക്കുന്ന 10 നടപ്പന്തലുകളും ജർമൻ പന്തലുകളും സജ്ജമാക്കും. നവംബർ 16ന് വൈകിട്ട് 5 മണിക്കാണ് മണ്ഡല മകരവിളക്ക് തീർത്ഥാടനത്തിനു വേണ്ടി ശബരിമല നട തുറക്കുക. ഡിസംബർ 27ന് മണ്ഡലപൂജയ്ക്ക് ശേഷം അന്ന് രാത്രി നട അടയ്ക്കും. പിന്നീട് മകരവിളക്കിന് വേണ്ടി ഡിസംബർ 30ന് വീണ്ടും ശബരിമല നട തുറക്കും. 2026 ജനുവരി 14നാണ് ഇത്തവണത്തെ മകരവിളക്ക്.